İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 615 Hüküm no: 473 Orijinal metin no: [158a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Cezayir Valisi Mustafa Paşa’nın Cezayir hazinesine emaneten bırakılan altınlarını getirip varislerine vermek üzere Hüseyin Bey’in vekil tayin edildiği Bahr-i sefîd’de vâki‘ Cezâyir vâlîsi iken bundan akdem vedâ‘-ı âlem-i fânî eden merhûm Mustafa Paşa b. Abdurrahman’ın verâseti zevce-i metrûkesi İsmihan Hatun bt. Abdullah b. Abdurrahman ile sulbî kebîr oğlu umdetü’l-müderrisîn İbrahim Efendi’ye münhasıra olduğu şer‘an zâhir ve müte‘ayyen oldukdan sonra zâtını ma‘rifet-i şer‘iye ile ârifân Hazînedâr Yusuf Çelebi b. Bâyezid ve Murad Bey b. Hüseyin ta‘rîfleriyle mu‘arrefe olan mezbûre İsmihan Hatun ile mûmâ-ileyh İbrahim Efendi meclis-i şer‘-i şerîf-i enverde işbu râfi‘u’l-kitâb Hüseyin Bey b. Fazlullah mahzarında her biri ikrâr-ı tâm ve takrîr-i kelâm edip mûrisimiz mûmâ-ileyh Mustafa Bey mahrûse-i Cezâyir’de fevt oldukda menkūlât-ı terekesi işbu mezbûr Hüseyin Bey yediyle gelip bize teslîm olunup ve nukūd-ı terekesi olan iki bin kırk eşrefî altını cezîre-i mezbûre ocağı hazînesine emânet vaz‘ olunmuş idi. Zikr olunan iki bin kırk eşrefî altını emîn-i beytü’l-mâlden taleb ve da‘vâ ve ahz u kabz ve ba‘de’l-kabz getirip bize teslîme her birimiz tarafımızdan işbu mezbûr Hüseyin Bey’i vekîl ve nâib-i menâb nasb ve ta‘yîn edip mezbûr Hüseyin Bey dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd ve iltizâm eyledi dediklerinde mukırrân-ı mezbûrân İbrahim Efendi, İsmihan Hatun’un ber-vech-i muharrer cârî ve sâdır olan cemî‘-i kelimâtlarını el-mukarru lehu’l-mezbûr Hüseyin Bey vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Fî 10 min-Saferü’l-hayr sene [1]108. Şuhûdü’l-hâl: Fahrü’l-a’yân Hazînedâ[r] Yusuf Bey b. Bâyezid, Abdullah Bey b. Mehmed, Murad Bey b. Hüseyin, Fazlı Bey b. ( ) Vekîlharc.