İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 616 Hüküm no: 474 Orijinal metin no: [158a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenibahçe’deki Süleyman Paşa Bostanı diye bilinen bostanın kiracıları Lalu v. Saho ile Trapo v. Raçko’nun bostanda bulunan aletler ile tohumların üçte birini Dimitri v. Foti’ye sattıkları Husûs-ı âti’z-zikrin mahâllinde ketb ü tahrîri için savb-ı şer‘den bi’t-taleb irsâl olunan Ebûbekir Efendi b. el-Hâc Abdülkerim mahmiye-i İstanbul’da Yenibahçe kurbünde merhûm Kul Kethudâsı Süleyman Paşa Bostanı demekle ma‘rûf bostana varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde merhûm-ı mûmâ-ileyhin oğlu olup bostan-ı mezbûrun mutasarrıfı olan Mehmed Bey hazır iken bostan-ı mezbûrun müste’cirlerin olan mezbûr Lalu v. Sahor ve Tarapo v. Raçko nâm zimmîler meclis-i ma‘kūd-ı mezbûrda râfi‘ü hâze’l-kitâb Dimitri v. Foti nâm zimmî muvâcehesinde her biri ikrâr-ı tâm ve takrîr-i kelâm edip mezbûr Mehmed Bey bostan-ı mezbûru bundan akdem ikimize beher sene yedişer bin akçeye îcâr ve teslîm etmiş idi, hâlâ beynimizde fesh-i akd-i icâre edip mezbûr Mehmed’in bostan-ı merkūmu bizimle merkūm Dimitri’ye yedi bin akçeye îcâr ve teslîm biz dahi ba‘de’l-istîcâr içinde hâlâ mevcûd ve der-anbâr olup ale’l-iştirâki’s-sevî bizim müstakillen mülkümüz olan on vakıyye pancar tohumu ve bir vakıyye hıyar tohumu ve nısf vakıyye salata tohumu ve beş bel iki çapa ve iki tarak ve bir tancere ve bir balta ve bir kantar ve bir keser ve iki çanak ve iki kova ve beş fıçı ve beş sepet ve sâir bostancı âlâtının sülüs-i şâyi‘ini mezbûr Dimitri’ye on bin akçeye bey‘ ve temlîk ve teslîm edip ol dahi iştirâ ve kabûl ve temellük ve tesellüm eyledikden sonra semeni olan meblağ-ı merkūm on bin akçeyi yedinden ahz u kabz ve tesellüm eyledik, fîmâ-ba‘d zikrolunan tohum ve eşyânın sülüsü mezbûr Dimitri’nin mülk-i müşterâsı ve bostan-ı merkūme târih-i kitâbdan otuz beş gün mukaddem Dimitri ile ma‘an zer‘ etmekle üçümüz amelinden hâsıl olan turp ve pırasa ve sâir sebzenin sülüsü mezbûr Dimitri’nin mülk-i mahzı ve hakk-ı sarfıdır, zikrolunan tohum ve eşyâ mezrû‘ât üçümüzün beyninde müşâ‘ ve müşterek mülkümüz olmağla birbirimiz ile vechen mine’l-vücûh da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î vâki‘ hâli mezbûr Ebûbekir Efendi mahâllinde ketb ü tahrîr edip ba‘dehû ma‘an ba‘s olunan Mehmed Çelebi b. Hüseyin ve İbrahim Çelebi b. Ahmed ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî 3 min-Saferü’l-hayr sene [1]108. Şuhûdü’l-hâl: Mehmed Çelebi b. Ahmed Yazıcı, Mustafa Çavuş b. Abdullah, Ahmed Bey Kethudâ-yı Bostânîyân, Muslı b. Ebîbekir Kethudâ-yı sâbık, Mustafa b. Abdullah ehl-i hibre, İsmail b. Mehmed, Süleyman b. Hasan, Mehmed Çelebi b. Ramazan, Kara Mehmed b. Hüseyin, Ali b. Süleyman ve gayruhum.