İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 617 Hüküm no: 475 Orijinal metin no: [158b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Osman’ın, Mehmed Beşe b. Musa’dan aldığı borcu ödemesi gerektiği Mahmiye-i İstanbul’da Koca Mustafa Paşa mahallesinde sâkin Mehmed Beşe b. Musa nâm kimesne Dîvân-ı kāimmakām-ı hazret-i sadrazamîde ma‘kūd-ı meclis-i şer‘i şerîf-i enverde mahmiye-i mezbûrede Kumkapı kurbünde Süleyman Ağa mahallesinde sâkin işbu râfi‘u’l-kitâb Mehmed Ağa b. Osman mahzarında üzerine da‘vâ ve takrîr-i kelâm edip bundan akdem mezbûr Mehmed Ağa’ya Kırkçeşme kurbünde vâki‘ medrese içinde ikrâz ve teslîm eylediğim iki yüz yirmi guruşun yüz yetmiş guruşu mukābelesinde bir mücevher üç paftalı kuşak ve bir re’s alaca bargir ve nakid elli guruşu mezbûr Mehmed Ağa edâ ve teslîm ben dahi bi’t-tamam ahz u kabz ve istifâ eylediğimden sonra tekrar malımdan mezbûr Mehmed Ağa’ya yirmi yaldız altınımı idâne ve teslîm ol dahi istidâne ve kabz ve kendi mesârifine sarfla istihlâk etmişdir, hâlâ suâl olunup alıverilmesi matlûbumdur dedikde gıbbe’s-suâl mezbûr Mehmed Ağa cevâbında müdde‘î-i mezbûr mukaddemâ bana ikrâz ve teslîm edip ba‘dehû ber-vech-i muharrer ahz ve istifâsına mu‘terif olduğu meblağ-ı mezbûr iki yüz yirmi guruşdan mâ‘adâ müdde‘î-i merkūmdan yirmi yaldız altını istidâne ve kabzı bi’l-külliye inkâr edicek müdde‘î-i mezbûrdan müdde‘âsına beyyine taleb olundukda ityân-ı beyyine için istimhâl etmekle mehil-i şer‘î birle ba‘de’l-imhâl ityân-ı beyyineden ızhâr-ı acz ile istihlâf etmeğin müdde‘î-i mezbûrun kabzına mu‘terif olduğu meblağ-ı mezbûr iki yüz yirmi guruşdan mâ‘adâ müdde‘î-i mezbûrdan yirmi yaldız altını dahi istidâne ve kabz etmeyip ol vechile meblağ-ı mezbûrun müdde‘î-i mezbûra edâsı üzerine lâzım geldiğine mezbûr Mehmed Ağa’ya yemîn teklîf olundukda ol dahi hasebi’l-mesûl yemîn billâhi te‘âlâ etmeğin mûcebiyle müdde‘î-i mezbûr bilâ-beyyine bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fî 7 min-Saferü’l-hayr sene [1]108. Şuhûdü’l-hâl: Fahrü’l-emâcid ve’l-ekârim Mehmed Ağa Ser Çavuşân, Umdetü erbâbü’t-tahrîr ve’l-kalem Tezkire-i evvel Yusuf Efendi, Zübdetü ashâbi’t-tastîr ve’r-rakām Tezkire-i sânî Hâfız Mehmed Efendi, Fahrü’l-eşbâh ve’l-a‘yân Muhzır Mehmed Ağa, Mehmed Çavuş b. ( ), İbrahim Çavuş b. ( ), el-Hâc Halil Efendi, Ali b. ( ) Çukadâr, Abdülkerim b. Mustafa, Mehmed Çelebi b. Mustafa, Mehmed b. Abdullah, Ahmed Çelebi b. İbrahim.