İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 618 Hüküm no: 476 Orijinal metin no: [158b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcıların işlerine karışarak sanatlarını yapmaya engel olan Nikfor v. Kostantin’in, bir daha usulsüz hareketler yapmayacağına dair söz verdiği Mahmiye-i İstanbul’da şîrugancı tâifesinin kethudâları olan Receb b. Abdullah ve yiğitbaşıları olan Mehmed b. Yusuf ve ihtiyârlarından Hüseyin b. Mehmed ve Mehmed Yazıcı b. Mustafa ve İskender b. Murad ve İbrahim b. el-Hâc Mustafa ve Lefter v. Yuvan ve Anton v. Paraşko ve İstati v. Anaştaş ve Paraşko v. Kapan ve Dimitri v. Turak ve Yuvan v. Marat ve Arşon v. Dimitri ve Nulta v. Kozme ve Yani v. Kosta ve Todori v. Yuvan ve Petro v. Angili ve Avram v. Dimitri ve Anaştaş v. Kiga ve İstavraloş v. Kiryaki ve Zahraya v. Dimitri ve Paraşko v. Manol ve Turmış v. Dimitri ve Sava v. Petro ve sâirleri meclis-i şer‘-i şerîf-i enverde mahmiye-i mezbûrede Kadıçeşmesi kurbünde yağcı olan Nikfor v. Kostantin nâm zimmî muvâcehesinde her biri takrîr-i kelâm ve ta‘bîr ani’l-merâm edip taşradan mahmiye-i mezbûreye sisam ve sâir metâ‘ımız geldikde kethudâ ve yiğitbaşı ve ihtiyârlarımız ma‘rifetleriyle iştirâ ve kârhânelerimize ale’s-seviye tevzî‘ ve taksîm olunup nizâm-ı hâlimiz bu vech üzere muntazam iken mezbûr Nikfor kadîmden olagelene muhâlif tevzî‘ ve taksîme mâni‘ olduğundan mâ‘adâ şerîr ve telbîs olup iştirâ eylediği sisamın semenini tüccâr tâifesine edâ etmeyip ve cümlemize şütûm-ı galîza ile şetm ve iftirâ edip beynimizde bâ‘is-i ihtilâl olmuşdur deyü da‘vâya mütesâddî olmuş idik, hâlâ mezbûr Nikfor ba‘de’l-yevm san‘at-ı mezbûra karışmayıp beynimizde ihtilâle bâdî olmamağla râzı ve müte‘ahhid olmuşdur, hâlâ suâl olunup takrîri tahrîr olunmak matlûbumuzdur dediklerinde gıbbe’s-suâl merkūm Nikfor cevâbında fi’l-hakīka kazıyye bâlâda tafsîl olunan vech üzere olup ba‘de’l-yevm san‘at-ı mezbûreye karışmayıp bâ‘is-i ihtilâl olmamak üzere râzı ve müte‘ahhid oldum deyü mezkûrûnu tasdîk ve tahkīk etmeğin mâ-hüve’l-vâki‘ bi’t-taleb ketb olundu. Fi’s-sânî aşer min-Muharremi’l-harâm sene [1]108. Şuhûdü’l-hâl: Mustafa Çelebi b. Mehmed, el-Hâc Süleyman b. Mehmed, Receb b. Osman, el-Hâc Mehmed b. İbrahim, İbrahim Çelebi b. Ahmed.