İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 619 Hüküm no: 477 Orijinal metin no: [159a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccardan olup Eğin’in Karışla köyünde bulunan Filibos v. Bedros v. Agop’un, tücca Ahmed b. Abdullah’a emaneten verdiği bir kese dolusu altının kaybolduğu Mahmiye-i İstanbul’da Validehanı’nda sâkin tüccâr tâifesinden olup hâlâ vilâyet-i Anadolu’da Eğin kazâsına tâbi‘ Karışlı nâm karyede olan Filibos v. Bedros v. Agop nâm zimmînin karındaşı ve tarafından husûs-ı âti’z-zikre vekîl olduğu hân-ı mezbûr odabaşısı Ali Çelebi b. Hasan ve Osman Yazıcı b. Ali şehâdetleri ile hasm-ı şer‘î-i câhid mahzarında şer‘an sâbit ve sübût-ı vekâletine hükm-i şer‘î lâhık olan Kazer nâm zimmî Dîvân-ı kāimmakām-ı hazret-i sadrazamîde ma‘kūd-ı meclis-i şer‘-i şerîf-i âlîde hân-ı mezbûrda sâkin tüccârdan işbu râfi‘u’l-kitâb el-Hâc Ahmed b. Abdullah mahzarında bi’l-vekâle üzerine da‘vâ ve takrîr-i kelâm edip târih-i kitâbdan altı ay mukaddem karındaşım müvekkil-i mezbûr Filibos kendi malı olan bin sekiz yüz kıt‘a eşrefî altın ve iki yüz kıt‘a efrencî altın ki cem‘an iki bin altını bir beyâz kîse içinde kendi mührü ile mühürlü olduğu hâlde mezbûr el-Hâc Ahmed’e hân-ı mezbûrda kendi sâkin olduğu odasında hıfz etmek [üzere] vedî‘aten def‘ ve teslîm ol dahi ahz u kabz etmiş idi, hâlâ zikrolunan altını mûda‘-ı mezbûr el-Hâc Ahmed’den bi’l-vekâle taleb ederim suâl olunsun dedikde gıbbe’s-suâl mezbûr el-Hâc Ahmed cevâbında fi’l-vâki‘ hân-ı mezbûrda vâki‘ odamda hıfz etmek üzere müvekkil-i mezbûr Filibos’dan içinde altın olmak üzere mârrü’z-zikr mühürlü beyâz kîsesini târih-i mezbûrda vedî‘aten ahz u kabz edip oda-i mezbûrda kendi malımı hıfz eylediğim dolaba vaz‘ ve hıfz etmiş idim. Lâkin vedî‘a-i mezbûre zikrolunan dolabımdan bilâ-teadd velâ taksîr zâyi‘a olmağın hatta müvekkil-i mezbûr Filibos bin yüz yedi senesi Şa‘bâni’l-mu‘azzamının yirmi beşinci günü hâlâ Rumeli kazaskeri olan a‘lemü’l-ulemâi’l-izâm es-Seyyid Ali Efendi hazretleri huzûrunda Dîvân-ı kāimmakām-ı sadrazamîde ma‘kūd-ı meclis-i şer‘-i âlîde vedî‘a-i mezbûreyi benden taleb ve da‘vâ eyledikde ben dahi ber-vech-i meşrûh dolabımdan bilâ-te‘add velâ taksîr zâyi‘ oldu dediğimde mezbûr Filibos husûs-ı mezbûrda benim için te‘addî ve istihlâk iddi‘â etmeyip ve zikrolunan beyâz kîse içinde altının adedi benim ma‘lûmum olmadığını mukırr ve mu‘terif olduğundan mâ‘adâ benim üzerime red ve damândan nesne lâzım gelmediğine tahlîfe dahi tâlib olmamağla mezbûr Filibos bî-vech mu‘ârazadan men‘ olunup yedine işbu hüccet-i şer‘iye verilmişdi deyü müşârun-ileyh es-Seyyid Ali Efendi hazretlerinin imzâsıyla mumzât ve hatmiyle mahtûme ve târih-i mezkûr ile müverraha ve mazmûnu min-külli’l-vücûh takrîr-i meşrûhuna muvâfık bir kıt‘a hüccet-i şer‘iye ibrâz etmeğin gıbbe’l-istintâk vekîl-i mezbûr Kazer mazmûn-ı hüccet-i mezkûreyi bi’t-tav‘i’s-sâf ikrâr ve i‘tirâf ol dahi tahlîfe tâlib olmamağın mûcebiyle vekîl-i mezbûr Kazer bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fî 3 min-Saferü’l-hayr sene [1]108. Şuhûdü’l-hâl: Umdetü’l-eşbâh ve’l-a‘yân Mehmed Ağa Ser Çavuşân, Umdetü erbâbü’t-tahrîr ve’l-kalem Tezkire-i evvel Yusuf Efendi, Zübdetü ashâbi’t-tastîr ve’r-rakām Tezkire-i sânî Hâfız Mehmed E[fendi], Mehmed Ağa Ser-muhzırân, Odabaşı Mustafa Ağa, Mustafa Efendi nâib-i recül, Receb Efendi nâib-i kapan, el-Hâc Halil Efendi b. Mehmed tâbi‘-i ( ), el-Hâc Ali Beşe b. Mehmed, el-Hâc Ebûbekir Beşe b. Sinan, Murad Efendi b. Ahmed, eş-Şeyh Mehmed Efendi b. İbrahim, el-Hâc Osman b. Abdullah, Mehmed Çelebi b. Mustafa Bevvâb-ı sultânî, Yusuf Çelebi b. Abdullah, el-Hâc Derviş Ağa b. Abdullah, İslâm Efendi b. Mehmed, Ali Efendi b. Abdullah.