İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 623 Hüküm no: 480 Orijinal metin no: [160b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirkapı’dan çıkıp Yenikapı Mevlevihanesi’ndeki üç çeşmeye ulaşan su yollarının tamiri için geliri kullanılmak üzere, dört aded baca ve su kanalının Mehmed Ağa b. Mustafa’ya kiralandığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverde bi’t-taleb irsâl olunan Ebûbekir Efendi b. el-Hâc Abdülkerim bi’l-fi‘il gümrük emîni olan umdetü’l-emâcid ve’l-ekârim Mehmed Ağa b. Mustafa’nın mahmiye-i İstanbul’da Sarı Musa mahallesinde sâkin olduğu menzile varıp bi’l-fi‘il su nâzırı olan umdetü’l-eşbâh ve’l-a‘yân Osman Ağa b. Ali sâbıkā su nâzırı olup şehremîni kâtibi olan umdetü erbâbü’t-tahrîr ve’l-kalem Mehmed Efendi ve râh-ı âbîlerden Saray-ı cedîd ve atik-i sultânî bölükbaşısı el-Hâc Hüseyin b. Ömer ve mevzi‘-i âtîde vâki‘ Turunçluk suyu huddâmından Ramazan b. Abdullah ve Mustafa b. Receb ve merhûm Davudpaşa su yolcusu ve Usta Mehmed b. Abdullah ve merhûm ve mağfûrun-leh Ebulfeth Sultân Mehmed Han Bölükbaşısı Usta Mehmed b. Abdullah ve râh-ı âbîlerden Kâtib el-Hâc Abdullah ve Usta Yahya b. Abdullah ve sâir zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde bi’l-fi‘il İstanbul kadılarının nezâret-i aliyyelerinde olan evkāfdan merhûm Koca Hacı Sofu Mehmed Paşa Vakfı’na evlâdiyet ve meşrûtiyyet üzere bi’l-fi‘il mütevellî olan Abdullah Bey b. Mustafa tarafından kāimmakām-ı mütevellî olan Mustafa Efendi b. el-merhûm Fazlullah Efendi meclis-i ma‘kūd-ı mezbûrda mûmâ-ileyh Mehmed Ağa b. Mustafa mahzarında bi’t-tevliye ikrâr-ı tâm ve takrîr-i kelâm edip vâkıf-ı mezbûrun mahmiye-i İstanbul’da hısnı ebvâbında Topkapısı hâricinde hadâyik-i sultâniyede Davutpaşa Bahçesi kurbünde merhûm Sultân Ahmed Han kubbesi yanında Demirkapı demekle ma‘rûf mevzi‘de vâki‘ dört aded yapılı bacalarından cem‘ olup yine bâb-ı mezbûr hâricinde vâki‘ Fazlı Paşa Bahçesi ardında hafr etdirdiği bacalara cereyân edip ondan dahi hâsıl olan su ile ba‘de’l-cem‘ mahmiye-i mezbûrede Mevlevîhâne-i Yenikapısı dâhilinde vâki‘ üç aded çeşmelere cereyân eden suyun yolları mürûr-ı eyyâm ve şuhûr ile bi’l-külliye harâb olup zikrolunan üç aded çeşmelere kat‘an su cereyânı mümkün olmayıp ve ta‘mîr ü termîme vakf-ı mezbûrda bir vechile kadr ve vüs‘ati dahi olmayıp cümlesi zâyi‘ ve telef olmak mukarrer olup ve mârrü’z-zikr Demirkapı nâm mevzi‘de olan bacalar ve kanevât mahmiye-i mezbûreye ba‘îd ve Fazlı Paşa Bahçesi ardında olan baca ve kanevât karîb olmağla mârrü’l-beyân Demirkapı nâm mevzi‘de vâki‘ dört aded bacalardan cem‘ olan suyun kanevâtına mu‘accele-i misliye ile âhara îcâr ve mu‘accelesi ile sâlifü’z-zikr Fazlı Paşa Bahçesi ardında vâki‘ bacalardan cem‘ olan suyu sâlifü’z-zikr çeşmelere icrâ için kanevâtı ta‘mîr ü termîm olunmak vakf-ı mezbûr hakkında min-külli’l-vücûh evlâ ve enfa‘ olup ve husûs-ı mezbûr yedimde olan hüccet-i şer‘iye nâtık olduğu üzere kıbel-i şer‘den me’zûn olmağla nâzır-ı mûmâ-ileyh ve zikrolunan bölükbaşılar ve râh-ı âbîler mârrü’z-zikr dört aded bacada hâsıl olan suyu zeyl-i kitâbda muharrerü’l-esâmî olan Müslimîn huzûrlarında keşf ü mu‘âyene ve vezn eylediklerinde ancak iki masûra ve nısf çuvaldız su mevcûd olup ve yolları bi’l-külliye müşrif-i harâb olup bir vechile icrâ mümkün olmadığı zâhir ve müte‘ayyen olmağla sûk-ı sultânîde kirâren ve mirâren nidâ ve müzâyede etdirip rağabât-ı nâs munkatı‘a oldukda mûmâ-ileyh Mehmed Ağa üzerinde bin guruşda karâr edip ziyâde ile tâlib-i âhar olmayıp ve meblağ-ı mezbûr bin guruş zikrolunan kanevâtın ecr-i misli idiğin vukūf-ı tâmmı olan Müslimîn-i mezkûrînin icmâ‘ ve ittifâklarıyla zâhir ve müte‘ayyen olmağla vâkıf-ı mezkûrun ancak sâlifü’z-zikr Demirkapı nâm mevzi‘de olan dört aded baca ve kanevâtını taraf-ı vakıfdan bilâ-izni’ş-şer‘î mu‘accele-i misliyesi olan meblağ-ı mezbûr bin guruşa mûmâ-ileyh Mehmed Ağa’ya îcâr ve teslîm ol dahi mâ-i mezkûru mahâll-i mezbûrdan bir münâsib suya ilhâk ondan mahmiye-i mezbûrede Avratpazarı’nda kendi sâkin olduğu işbu menzilde muharrer binâ eylediği çeşmeye icrâ için istîcâr ve kabûl eylediğinden sonra mu‘accele-i mezbûr bin guruşu vâkıf-ı mezbûrun mârrü’z-zikr Fazlı Paşa Bahçesi ardında vâki‘ baca ve sâir su yollarını ta‘mîr ü termîm için bi’t-tevliye ahz u kabz ve tesellüm eyledim, fîmâ-ba‘d sâlifü’z-zikr Demirkapı’da vâki‘ kanevât-ı muharrere-i mezbûre mûmâ-ileyh Mehmed Ağa’nın dâhil-i havza-i tasarrufu olmuşdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr Ebûbekir Efendi mahâllinde ketb ü terkīm ba‘dehû ma‘an ba‘s olunan Abdurrahman Efendi b. Mehmed ve Mustafa Çelebi b. İsmail ile meclis-i şer‘e gelip alâ vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Saferü’l-hayr li-sene semân ve mie ve elf. Şuhûdü’l-hâl: [161a] Mehmed Efendi nâzır-ı sâbık, el-Hâc Abdurrahman Ağa b. el-Hâc Mehmed Diyârbekirî, el-Hâc Halil Ağa b. Mehmed el-Bezistânî, es-Seyyid İbrahim Çelebi en-Nakkāş, el-Hâc Mustafa b. Yusuf, Mustafa Câbî-i vakf, İbrahim Ağa b. Osman, Pîrî Çelebi b. Mehmed, Yahya Ağa b. Ömer, Mehmed Ağa b. Musli, Mustafa Çelebi b. Veli, Ahmed Çelebi b. Abdullah, Ali Ağa b. Sinan, Derviş Mehmed Çelebi b. Süleyman, Abdullah Bey b. Abdullah, Mehmed Bey b. Mustafa, Ali Bey b. Abdullah, el-Hâc İbrahim b. el-Hâc Halil, Abdülbaki b. Ali, Abdullah Efendi İmâ[m]-ı câmi‘-i Dârü’s-sa‘âde, İsmail Efendi b. Abdullah, Süleyman Halîfe el-müezzin, Mustafa b. Süleyman, Mehmed Çelebi b. Mahmud el-Mühürdâr, ve gayruhum.