İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 628 Hüküm no: 483 Orijinal metin no: [162a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako v. Orham’ın, sâbık Boğdan voyvodası Kostantin v. Duka’nın annesi Domine Anaştaşya bt. Tabize’ye verdiği borca karşılık aldığı rehin eşyanın satıldığı Husûs-ı âti’z-zikrin mahâllinde ketb ü tahrîri için taraf-ı şer‘den bi’t-taleb irsâl olunan Ebûbekir Efendi b. el-Hâc Abdülkerim sâbıkā Boğdan voyvodası olan Kostantin v. Duka’nın mahmiye-i İstanbul hısnı ebvâbından Fenerkapısı hâricinde Abdi Subaşı mahallesinde sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i hatîr eyledikde mezbûr Duka’nın zevcesi merkūme Kostantin’in anası Domine Anaştaşya bt. Tabize v. Dimitraki tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iye ile ârifân mahrûse-i Galata’da Kalafatçıbaşı mahallesi ahâlîsinden Dimitri v. Kalo ve menzil-i mezbûrda sâkin Gavril v. Kostantin şehâdetleriyle şer‘an sâbit olan mezbûr Kostantin’in tercümanı İvaz v. Hristo nâm zimmî meclis-i ma‘kūd-ı mezbûrda İngiliz elçisinin tercümanlarından işbu sahibü’l-vesîka Yako v. Avraham nâm Yahûdî muvâcehesinde bi’l-vekâle ikrâr ve takrîr-i kelâm edip müvekkilem mezbûre Domine Anaştaşya bundan akdem mezbûr tercüman Yako’dan on bir bin guruş istidâne ve kabz edip zimmetinde deyni olmağla meblağ-ı mezbûr mukābelesinde eşyâ-i memlûkesinden ortası otuz dokuz elmas taşlı bir altın ön kuşak ve ortası yirmi bir kebîr elmas ve etrâfında yirmi iki sagīr elmas ve sekiz hurda yâkut taşlı bir kuşak ve birer elmas taşlı yirmi dört habbe altın düğme ve otuz dokuz elmas taşlı bir altın sorguç ve her çiftinde otuz üçer elmas taşlı ki cem‘an üç yüz doksan altı taşlı on iki çift düğmeli çaprast [çapras] ve on iki çift elmas ve yirmi dört yâkut taşlı bir çift altın bilezik ve mecmû‘u kırk sekiz elmas taşlı bir çift altın bilezik yedine rehin vaz‘ ve teslîm edip mezbûr Yako dahi ba‘de’l-irtihân ve’l-kabz deyn-i mezbûrun bin guruşunu mezbûr Yako’ya edâ ve teslîm edip on bin guruş deyni bâkī kalmağla müvekkilem mezbûre Domine Anaştaşya deyn-i mezbûrunun ancak dört bin guruşunu bin yüz yedi senesi mâh-ı Cumâdelûlâsı’nın sekizinci gününden on beş gün tamamına değin ve bâkī altı bin guruşunu müddet-i mezbûreden sonra elli gün tamamına değin edâ etmezse rehân-ı mezbûreden dört bin guruşa kâfî olan mikdârını târih-i merkūmda on beş gün tamamında ve mâ‘adâyı müddet-i mezbûreden sonra elli gün tamamında ba‘de’l-müzâyede semen-i misilleri ile âhara bey‘ ve kabz-ı semene ve semenlerinden deyn-i mezbûru mezkûr Yako’ya edâya ve fazla kalırsa kendüye îsâle azl ve in‘izâlden masûne vekâlet-i devriye ile tarafımdan işbu hazır bi’l-meclis Angeli v. Kordaki nâm zimmîyi vekîl nasb ve ta‘yîn edip ol dahi vekâlet-i mezbûreyi kabûl eyledikden sonra zikrolunan müddetler mürûr edip müvekkilem mezbûre Domine Anaştaşya deyn-i mezbûrundan kat‘a bir habbe edâ etmemekle mezbûr Terceman Yako dahi sene-i mezbûrede Rumeli kādıaskeri olan a‘lemü’l-ulemâi’l- mütebahhirîn sa‘âdetlü Mirza Mustafa Efendi hazretleri huzûrunda rehân-ı mezbûreyi ber-vech-i muharrer bey‘ ve semenlerinden edâ-i deyne vekâlet-i devriye ile mezbûr Angeli’nin vekîli olduğunu da‘vâ ve müdde‘âsını şuhûd-ı udûlle şer‘an isbât etmekle mezbûrun vekâletine işbu hüccet-i şer‘iyeler nâtıka olduğu üzere hükm-i hâkimü’ş-şer‘ lâhık olmağla vekîl-i mezbûr Angeli dahi rehân-ı mezbûreyi vekâleti hasebiyle sûk-ı sultânîde ba‘de’n-nidâ ve’l-müzâyede kuyumcubaşı defteri nâtık olduğu üzere semen-i misilleri idiği vukūf-ı tâmmı olan bî-garaz Müslimîn’in icmâ‘ ve ittifâkları ile sâbit ve zâhir olan cem‘an dellâliyesinden mâ‘adâ altı bin altmış sekiz guruşu ma‘rifet-i şer‘le kuyumcu tâifesinden el-Hâc Hüseyin Çelebi ve Hasan Çelebi nâm kimesenelere bi’l-vekâle bey‘ ve teslîm ve semen-i mezbûru ba‘de’l-kabz dâyin-i mezbûr Yako’ya deyn-i mezbûrun ol mikdârına mahsûben edâ ve teslîm ol dahi ahz u kabz etmiş idi. Mezbûre Domine Anaştaşya dahi bey‘-ı mezbûru tecvîz edip eşyâ-i muharrere-i mezbûreye ve semenlerine müte‘allika âmme-i da‘vâdan dâyin-i mezbûr Yako’nun zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi, min-ba‘d müvekkilem mezbûre Domine Anaştaşya’nın mezkûr Yako ile vechen mine’l-vücûh da‘vâ ve nizâ‘ı kalmadı dedikde vekîl-i mezbûr İvaz’ın ber-vech-i muharrer cârî ve sâdır olan cemî‘-i kelimâtını el-mukarru lehu’l-mezbûr Yako vicâhen tasdîk ve şifâhen tahkīk etmeğin vâki‘ hâli mevlânâ-yı mezbûr Ebûbekir Efendi mahâllinde ketb ü tahrîr edip ba‘dehû ma‘an ba‘s olunan [162b] Ahmed Çelebi b. Abdullah ve Hüseyin b. Mustafa ile meclis-i şer‘e gelip alâ vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 13 min-Saferü’l-hayr sene [1]108. Şuhûdü’l-hâl: eş-Şâhidûnü’s-sâbıkūn.