|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 108 Hüküm no: 106 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ebu Zeyd b. Mehmed’in borcu ödendikten ve masrafları çıktıktan sonra terekesinden kalan paranın vârislerine iletildiği
Diyâr-ı Mağrib’de Cezîre-i Cerbe ahâlîsinden olup mahmiye-i İstanbul’da ticâret üzere iken fevt olan Ebu Zeyd b. Mehmed’in bi’l-inhisâr vârisleri olup hâlâ cezîre-i mezbûrede sâkin olan babası merkūm Mehmed vâlidesi Mümine bt. Ahmed Molazî taraflarından müteveffâ-i mezbûrun muhallefâtı mahmiye-i merkūmede vâzı‘u’l-yed olanlardan da‘vâ ve talebe ve ahz u kabz ve kendilere îsâle vekîl olup vekâleti hasm-ı câhid-i şer‘î mahzarında eş-Şeyh Ebulkasım b. Abdülaziz ve Ramazan Reis b. Ömer şehâdetleri ile şer‘an sâbite olan el-Hâc Ebu Zeyd b. el-Hâc Salih mahfil-i kazâda müteveffâ-i mezbûrun muhallefâtına vâzı‘u’l-yed olan işbu bâ‘isü’l-kitâb Said b. Salih mahzarında ikrâr-ı tâm ve takrîr-i kelâm edip mezbûr Said müteveffâ-i mezbûrun muhallefâtını bey‘ edip semenlerinden hâsıl olan sekiz bin dört yüz akçeden iki bin sekiz yüz akçe techîz ve tekfînine ve iki bin üç yüz seksen akçe Ali b. Salih Hindusî nâm kimesneye olan deynine ve sekiz yüz elli akçe mukaddemâ müvekkilân-ı mezbûrâna irsâl edip ancak yedinde iki bin üç yüz yetmiş akçe bâkī kalmağın mebî‘-i mezbûr iki bin üç yüz yetmiş akçeyi vekâletim hasebiyle bi’t-tamam ve’l-kemâl ahz u kabz edip müteveffâ-i mezbûrun muhallefâtına müte‘allik da‘vâdan mezbûr Said’i ibrâ ve ıskāt eyledim, min-ba‘d da‘vâm kalmadı da‘vâ dahi edersem istimâ‘ olunmaya dedikde, gıbbe’t-tasdîk mâ-vaka‘a gıbbe’t-taleb ketb ü sebt olundu.
Fi’l-yevmi’s-sâlis ve’l-ışrîn min-Şevvâli’l-mükerrem li-sene selâse ve sittin ve elf.
Şuhûdü’l-hâl: el-Hâc Ramazan b. Mehmed, el-Hâc Cuma b. Mansur, el-Hâc Ebûbekir b. Ebîzeyd, Mehmed Beşe b. Süleyman, Hasan Çelebi b. Kanber ve gayruhum mine’l-huzzâr.
|