İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 632 Hüküm no: 485 Orijinal metin no: [163a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat etmiş olan Bolu valisi Mustafa Paşa’nın Felemenk tüccarından Garak v. Romiron’a olan borcuna kefili Sahhaf Ali Efendi ile alacaklı Garak’ın zimmetlerini ibra ettikleri Medîne-i Edirne’de Kassâb Abdülaziz mahallesi ahâlîsinden olup hâlâ medîne-i hazret-i Ebî Eyyub Ensârî’de Otakçılar nâm mahâlde sâkin Sahhâf Ali Efendi b. Abdurrahman nâm kimesne Dîvân-ı kāimmakām-ı hazret-i sadrazamîde ma‘kūd-ı meclis-i şer‘-i enverde Felemenk tüccârından Gıraf v. Romiroz nâm müste’men tarafından husûs-ı âti’z-zikre vekîl-i müsecceli olan tercüman Galilemo v. Cuvan muvâcehesinde üzerine da‘vâ ve takrîr-i kelâm edip müvekkil-i mezbûr Garak’ın Bolu vâlîsi olup medîne-i Edirne’de katîlen fevt olan Zor Mustafa Paşa b. Mehmed zimmetinde cihet-i karz-ı şer‘den altı yüz guruş hakkı olup meblağ-ı mezbûra ben emr ve kabûlü hâvî kefâlet-i sahîha-i şer‘iye ile kefîl olduğumdan sonra mûmâ-ileyh Mustafa Paşa yüz beş senesinde sefer-i hümâyûna giderken Kağıdhâne sahrâsında deyn-i mezbûrunun dört yüz guruşu mukābelesinde bir re’s bakla kır at ve nakid iki yüz guruş mezbûr Garak’a def‘ ve teslîm ol dahi tamamen ahz u kabz ve istifâ edip mûmâ-ileyh Mustafa Paşa medîne-i Edirne’de ber-vech-i muharrer fevt oldukdan sonra bin yüz altı senesinde mezbûr Garak, sen meblağ-ı mezbûra kefîl olmuş idin deyü benden bir def‘a yüz elli guruş ve bir def‘a yüz otuz beş guruş ve bir def‘a altmış guruş ve üç def‘a da iki yüz beş guruş ki cem‘an beş yüz elli kıt‘a guruşumu bi-gayr-ı hakkın ahz u kabz etmiş idi. Hâlâ suâl olunup ber-vech-i muharrer benden makbûzu olan beş yüz elli kıt‘a guruşu bana red ve teslîme vekîl-i merkūma tenbîh olunmak matlûbumdur dedikde gıbbe’s-suâl vekîl-i merkūm tercüman Galilemo cevâbında müvekkilim mezbûr Garak’ın mûmâ-ileyh Mustafa Paşa zimmetinde olan altı yüz guruşdan mâ‘adâ cihet-i karz-ı şer‘îden merkūm Ali Efendi’nin kendi zimmetinde altı yüz guruş hakkı olmağla mezbûr Ali Efendi hâlâ müdde‘âsı olan beş yüz elli guruşu cihet-i karz-ı şer‘îden ber-vech-i muharrer asâleten kendi deyni olan meblağ-ı mezbûr altı yüz guruş mukābelesinde def‘ ve teslîm edip ol dahi ahz u kabz eyledikden sonra bin yüz yedi senesi şehr-i Ramazanü’l-mübârekinin onuncu günü meblağ-ı mezbûre ve sâire müte‘allika âmme-i da‘vâdan mezbûr Sahhâf Ali Efendi müvekkilim mezbûr Garak’ın zimmetini ol dahi mezbûr Ali Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt etmişlerdir deyücek gıbbe’l-istintâk müdde‘î-i mezbûr Ali cevâbında fi’l-hakīka müvekkil-i mezbûra cihet-i karz-ı şer‘îden kendinin asâleten altı yüz guruş deyni olup hâlâ müdde‘âsı olan meblağ-ı mezbûr beş yüz elli guruşu kendi deyni için edâ ve teslîm eylediği ve târih-i mezbûrda meblağ-ı mezbûra ve sâire müte‘allika âmme-i da‘vâdan her biri âharın zimmetini ibrâ-i âm-ı kātı‘u’n-nizâ‘la ibrâ ve ıskāt eylediklerini bi’t-tav‘i’s-sâf ikrâr ve i‘tirâf etmeğin alâ mûceb-i i‘tirâfihî müdde‘î-i mezbûr Ali Efendi bî-vech mu‘ârazadan men‘ olunup mâ vaka‘a bi’t-taleb ketb olundu. Fî 14 min-Saferü’l-hayr sene [1]108. Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Yusuf Efendi, Zübdetü ashâbi’t-tastîr ve’r-rakām Tezkire-i sânî Hâfız Efendi, Umdetü’l-eşbâh ve’l-a‘yân Mehmed Ağa Ser Çavuşân, es-Seyyid Hasan Ağa b. Abdülkadir Ağa-i Kāimmakām Paşa, el-Hâc Halil Ağa b. İbrahim, Mehmed Çavuş b. ( ), el-Hâc Halil Efendi b. ( ), Mustafa Efendi nâib-i recül.