İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 634 Hüküm no: 487 Orijinal metin no: [163b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Şeyh Mehmed Geylânî Vakfı’na ait ve zaviyesine bitişik olup giriş kapısı zaviye tarafında olan mahzenin kiracısı Halil Ağa b. Hasan’ın mahzene geçişine mani olunmaması
Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi mahmiye-i İstanbul hısnı ebvâbından Bahçekapısı hâricinde vâki‘ merhûm eş-Şeyh Mehmed Geylânî Vakfı’ndan olup bir tarafdan ba‘zan arpacı ve ba‘zan berber dükkânları ve bir tarafdan vakf-ı mezbûr mütevellîsine meşrûta menzil ve bir tarafdan damlalık ve bir tarafdan vakf-ı mezbûrun zâviyesi ile mahdûd mahzenin üzerine varıp zeyl-i vesîka[da] muharrerü’l-esâmî Müslimîn huzûrlarında akd-i meclis-i şer‘ eyledikde mahzen-i mahdûd-ı mezkûra icâreteyn-i ma‘lûmeteyn ile mutasarrıf olan işbu râfi‘u’l-kitâb Halil Ağa b. Hasan meclis-i ma‘kūd-ı mezbûrda vakf-ı mezbûra meşrûtiyyet üzere mütevellî olan Abdullah Efendi b. Sâdık mahzarında üzerine da‘vâ ve takrîr-i kelâm edip işbu mahzen-i mahdûd-ı mezbûrun kadîmden kapısı zâviye-i mezkûre tarafında olup ve zâviye-i mezkûre arsasından hakk-ı mürûrum var iken bin yüz yedi senesinde vâki‘ harîkde muhterik olmağın müceddeden kârgir binâ edip vaz‘-ı kadîmi üzere işbu kapıyı zâviye-i mezkûre tarafına vaz‘ edip zâviye-i mezkûre arsasından kemâ-fi’l-evvel mürûr murâd eylediğimde mütevellî-i mezbûr bi-gayr-ı vechin zikrolunan kapıyı sed eyleyüp mürûrdan mâni‘ olmağla suâl olunup vaz‘-ı kadîmi üzere mürûra mâni‘ olmamak için tenbîh olunmak matlûbumdur dedikde gıbbe’s-suâl mütevellî-i mezbûr cevâbında fi’l-vâki‘ ber-vech-i muharrer mahzen-i mahdûd-ı mezkûrun zikrolunan kapısı kadîmden zâviye-i mezkûre tarafında olup ve arsa-i merkūma hakk-ı mürûru olduğunu bi’t-tav‘i’s-sâf ikrâr ve i‘tirâf etmeğin mûcebiyle müdde‘î-i mezbûr Halil Ağa’nın mürûruna mâni‘ olmamak üzere mütevellî-i mezbûra tenbîh eylediğini mevlânâ-yı mezbûr mahâllinde ketb ü tahrîr ve ma‘an ba‘s olunan Mehmed b. İbrahim ve Yusuf b. Abdurrahim ile meclis-i şer‘e gelip alâ vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu.
Fi’l-yevmi’s-sâdis aşer [164a] min-Saferü’l-hayr sene [1]108.
Şuhûdü’l-hâl: (…) el-Hâc Ali b. Hüseyin, Abdullah Çelebi b. Ahmed, Mehmed Çelebi b. Halil, Hasan Çelebi b. İbrahim, Süleyman Çelebi b. Bilal, Kabasakal Hüseyin.
|