İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 645 Hüküm no: 501 Orijinal metin no: [168a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ihtisabı Toygun Mustafa’ya verildiğinden eski Muhtesib Süleyman’ın işe karıştırılmaması A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü’l-müşkilâti’d-dîniye hallâlü’l-mufassalâti’l-yakīniye miftâhu künûzi’l-hakāyık messâhu rumûzi’d-dekāyık el-muhtassu bi-mezîd-i inâyeti’l-meliki’l-a‘lâ Anadolu kādıaskerliği pâyesiyle hâlâ İstanbul kadısı olan Mevlânâ Abdullah -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki bin yüz yedi senesine mahsûb olmak üzere İstanbul ihtisâbını der-uhde eden Toygun Mustafa -zîde kadrühû- Dîvân-ı hümâyûnuma arzuhâl sunup bin yüz yedi senesi Martı ibtidâsından ihtisâb-ı mezbûr kendüye der-uhde olunduğun bildirüp mu‘tâd-ı kadîm üzere peşîn ve kalemiyesin verip yedine berat-ı âlîşân alıp cüz’î ve küllî mukāta‘aların tâlibîne füruht ve temessük verip zamân-ı zabta bir kaç gün kalmış iken selefi Süleyman mukāta‘a-i mezbûra tâlib olup üzerinden bir tarîk ile ref‘ etdirmek murâd etmekle kendüye gadr olmağın cânib-i mîrîye bir yük akçe dahi teberru‘ olmak üzere teslîm-i Hazîne-i âmire eylediğinden sonra yedine verilen berat-ı âlîşân mûcebince zabtetdirmek bâbında emr-i şerîfim recâ eylediği ecilden imdi yüz bin akçeyi mîrîye teslîm eyledikden sonra tahvîl bozulmayıp mezkûr Toygun Mustafa’ya zabtetdirilmek bâbında fermân-ı âlîşânım sâdır olmuşdur buyurdum ki, hükm-i şerîfimle vardıkda bu bâbda sâdır olan emrim üzere amel edip dahi vech-i meşrûh üzere bin yüz yedi Recebi’nin on beşinci gününde Toygun Mustafa -zîde kadrühû- yediyle doksan dokuz bin akçe teslîm-i Hazîne-i âmire olunup ve mukaddemâ yedine berat-ı şerîf-i âlîşânım verilmekle mûcebince zabtetdirdip hilâf-ı berat-ı âlîşân âharı müdâhale etdirmeyesin, şöyle bilesin, alâmet-i şerîfe i‘timâd [kılasın]. Tahrîren fi’l-yevmi’r-râbi‘ aşer min-şehri Recebi’l-ferd li-sene seb‘a ve mie ve elf. Be-makām-ı Kostantıniyye el-mahrûse.