İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 690 Hüküm no: 526 Orijinal metin no: [181b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sulehaya meşruta olan bir evin Şeyh Mustafa Efendi’ye verilmesi İstanbul kadısı fazîletlü izzetlü efendi hazretleri, sulehâya meşrût olan süknâdan ibtidâ düşen mahlûl süknâyı sahib-i arzuhâl Şeyh Mustafa Efendi’ye veresin deyü buyruldu. Devletlü sa‘âdetlü sultânım hazretleri sağ olsun, geçen sene bu du‘âcıları için İstanbul kadısı efendi hazretlerine fermân-ı hümâyûn mûcebince mektûb-ı şerîf ihsân buyurulmuş idiği sulehâya meşrût süknâ düşdükde ihsân olunmak üzere bi-emrillâhi te‘âlâ eseri zuhûr eyledi süknâya kudretim olmamağla elân medresede olurum, eltâf-ı keremlerinden mercûdur, hâlime merhamet olunup kādı efendi hazretlerine ve kāimmakām paşa hazretlerine müekked mektûb-i şerîf sadaka ve ihsân buyurula. Sulehâya meşrût süknâ düşer ise bir imâmet mahlûl oldukda bu dâ‘îlerine sadaka ve ihsân olunmak ile ihyâ buyuralar. Bâkī fermân sultânım hazretlerinindir. Ed-Dâ‘î bi’l-hayr eş-Şeyh Mustafa