İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 694 Hüküm no: 532 Orijinal metin no: [182b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki Paşa ile kardeşi Mahmud Bey’in, hak sahibi oldukları Papaszâde Mustafa Çelebi, Kürekçibaşı Şemseddin Bey ve sair evkafın gelirleri ile alakalı birbirlerinin zimmetlerini ibra ettikleri İbrâ hüccetidir ki sehven bu mahalle kaydolundu. Medîne-i Ebî Eyyûb el-Ensârî’de Kızıl Mescid mahallesi sükkânından olup sâbıkā Mağrib vâlîsi olan fahrü’l-emâcid ve’l-ekârim Abdülbaki Paşa b. el-merhûm Ahmed Paşa meclis-i şer‘-i şerîf-i enverde karındaşı olup zikirleri âtî evkāfa evlâdiyet ve meşrûtiyyet üzere bi’l-fi‘il mütevellî olan umdetü’l-eşbâh ve’l-a‘yân el-Hâc Mahmud Bey mahzarında üzerine da‘vâ ve takrîr-i kelâm edip mahmiye-i İstanbul’da vâki‘ merhûmûn Papaszâde Mustafa Çelebi ve Kürekçibaşı Şemseddin Ahmed Bey ve Harem çavuşu ve Hoca Dursun ve Gazanfer Ağa Evkāfı gılâlinin izdiyâdı evlâdlarına ve evlâd ve evlâdlarına batnen ba‘de batnin meşrûta olup ve ben karındaşım mûmâ-ileyh Mahmud Bey ve vâkıfûn-ı mezbûrunun batn-ı evvelde olan evlâdından olmağla mûmâ-ileyh el-Hâc Mahmud Bey evkāf-ı mezbûreye ber-mûceb-i şart-ı vâkıfûn mütevellî olmağla mârrü’z-zikr Kürkçübaşı Şemseddin Ahmed Bey Vakfı gallesinin izdiyâdından târih-i kitâb senesi şehr-i Recebi’l-ferdi gurresine gelince müctemi‘ olan meblağdan benim hisseme âid olan iki bin beş yüz guruşu kabz ve kendi mesâriffına sarfla istihlâk etmişdir. Hâlâ suâl olunup zikrolunan Şemseddin Ahmed Bey Vakfı gallesinin izdiyâdından hisse-i mezbûreyi bana edâya mûmâ-ileyh el-Hâc Mahmud Bey’e tenbîh olunmak matlûbumdur dedikde gıbbe’s-suâl mûmâ-ileyh el-Hâc Mahmud Bey cevâbında ben evkāf-ı mezbûreye mütevellî olmağla evkāf-ı mezbûrenin nâzırı ve mürtezikaları huzûrlarında lede’ş-şer‘i’l-enver muhâsebem görülüp izdiyâd-ı mezbûreden ancak yedimde sekiz bin elli altı akçe zuhûr etmiş iken müdde‘î-i mezbûr Abdülbaki Paşa evkāf-ı mezbûreden mahmiye-i mezbûrda merhûm-ı merkūm Papaszâde Mustafa Çelebi’nin dârü’l-hadîsi [183a] kurbünde vâki‘ bir bâb menzil-i kebîri iki bin beş yüz guruşa taraf-ı vakfdan âhara îcâr ve ücret-i mezkûreyi ba‘de’l-kabz benim hisseme âid meblağı kendi mesârifine sarfla istihlâk eyledik deyü bundan akdem Rumeli kādıaskeri olan a‘lemü’l-ulemâi’l-mütebahhirîn sa‘âdetlü Mirza Mustafa Efendi hazretleri huzûrunda benden ba‘de’d-da‘vâ ve’l-münâza‘a şerh-i [şehr-i] mezbûrun ikinci günü müşârün-ileyh Mirza Mustafa Efendi kıbelinden husûs-ı âti’z-zikri tahrîre me’zûnen irsâl olunan Ahmed Efendi b. Ali’nin mahrûse-i Galata kazâsına kasaba-i Tophâne’de Salıpazarı kurbünde sâkin olduğum menzilde udûl-i Müslimîn mahzarlarında akd eylediği meclis-i şer‘de müdde‘î-i mezbûr Abdülbaki Paşa’yı da‘vâ-yı mezbûresinden benimle beş yüz guruş üzerine akd-i müsâlaha eylediklerinde ol dahi sulh-i mezbûru kabûl ve bedel-i sulh-i mezbûr beş yüz guruşu yedimden ahz u kabz edip mâ‘adâsına ve sâlifü’z-zikr Hoca Dursun ve harem çavuşu ve Kürekçibaşı Şemseddin Ahmed Bey Vakıfları gallâtından târih-i mezkûra gelince benim ahz u kabz ve istihlâk eylediğim meblağdan hissesine ve babamız merhûm-ı mezbûr Ahmed Paşa’dan müntakil olup Hisar’da vâki‘ ma‘lûmü’l-hudûd vakıf bahçe gallesinden kabz ve istihlâk eylediğim meblağdan hissesine ve târih-i mezbûra gelince beynimizde cereyân eden ahz ü i‘tâ [ve] vedî‘a ve havâle ve miras ve hîbe ve ikrâz ve iktirâz ve bey‘ ü şirâ ve sâir hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan mûmâ-ileyh Abdülbaki Paşa benim zimmetimi ibrâ ve ıskāt edip mezbûr Ahmed Efendi dahi mûmâ-ileyhin ikrârını mahâllinde tahrîr ba‘dehû ma‘an irsâl olunan Mustafa Çelebi b. Şaban ve Ahmed Çelebi b. Mehmed ile meclis-i şer‘e varıp alâ vukū‘ihî inhâ ve takrîr etmekle müşârün-ileyh Mirza Mustafa Efendi dahi ba‘de’t-tahrîr işbu hüccet-i şer‘iyeyi verip ol vechile târih-i mezkûra gelince cemî‘ da‘vâdan zimmetim berî olmuşdur deyü da‘vâyı def‘ ve müşârün-ileyh Mirza Mustafa Efendi’nin imzâsıyla mumzât ve hatmiyle mahtûme ve târih-i mezkûr ile müverraha ve mazmûnu min-külli’l-vücûh takrîr-i meşrûhuna muvâfık bir kıt‘a hüccet-i şer‘iye ibrâz etmeğin gıbbe’l-istintâk ve’l-inkâr mûmâ-ileyh Mahmud Bey’den mazmûn-ı hüccet-i mezbûreyi mübeyyene beyyine taleb olundukda udûl-i ahrâr-ı ricâl-i Müslimîn’den ve zeyl-i hüccet-i mezkûrede mastûrü’l-esâmî olan şuhûddan olup kasaba-i mezbûrede Süheyl Bey mahallesi sükkânından Ahmed Beşe b. İsmail ve Salih Çelebi b. Hüseyin ve Hüseyin Çelebi b. Abdullah ve Mustafa Çelebi b. Yusuf nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müdde‘î-i mûmâ-ileyh Abdülbaki Paşa evkāf-ı mezbûreden mahmiye-i mezbûrede mezbûr-ı merhûm Papaszâde Mustafa Çelebi’nin dârü’l-hadîsi kurbünde vâki‘ menzil-i kebîri iki bin beş yüz guruşa taraf-ı vakıfdan âhara îcâr ve ücret-i mezkûreyi ba‘de’l-kabz benim hisseme âid meblağı kendi mesârifine sarfla istihlâk eyledik deyü bundan akdem Rumeli kādıaskeri olan müşârün-ileyh Mirza Mustafa Efendi hazretleri huzûrunda ba‘de’d-da‘vâ ve’l-münâza‘a şehr-i mezbûrun ikinci günü müşârün-ileyh Mirza Mustafa Efendi kıbelinden husûs-ı mezbûru tahrîre me’zûnen irsâl olunan Ahmed Efendi b. Ali’nin mahrûse-i Galata kazâsına tâbi‘ kasaba-i Tophâne’de Salıpazarı kurbünde işbu mûmâ-ileyh el-Hâc Mahmud Bey’in sâkin olduğu menzilde udûl-i Müslimîn mahzarlarında akd eylediği meclis-i şer‘de müdde‘î-i mûmâ-ileyh Abdülbaki Paşa da‘vâ-yı mezbûresinden beynlerinde beş yüz guruş üzerine akd-i müsâlaha olundukda ol dahi sulh-i mezbûru kabûl ve bedel-i sulh-i mezbûr beş yüz guruşu yedinden ahz u kabz edip mâ‘adâsına ve mârrü’z-zikr Hoca Dursun ve harem çavuşu ve hâlâ münâza‘un-fîh Kürekçibaşı Şemseddin Ahmed Bey Vakıfları gallâtından târih-i mezkûra gelince mûmâ-ileyh el-Hâc Mahmud Bey’in ahz u kabz ve istihlâk eylediği meblağdan hissesine ve babalarından müntakil Hisar’da vâki‘ bahçe gallesinden kabz ve istihlâk eylediği meblağdan hissesine ve târih-i mezkûra gelince beynlerinde cereyân eden ahz u i‘tâ ve vedî‘a ve havâle ve miras ve hîbe ve ikrâz ve iktirâz ve bey‘ ü şirâ ve sâir hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan müdde‘î-i mûmâ-ileyh Abdülbaki Paşa karındaşı mûmâ-ileyh el-Hâc Mahmud Bey’in zimmetini bizim huzûrumuzda ibrâ ve ıskāt edip mezbûr Ahmed Efendi dahi mûmâ-ileyhin ikrârını mahâllinde ketb edip işbu hüccet-i şer‘iye tahrîr olunmuş idi. Biz bu husûsa bu vech üzere mazmûn-ı hüccet-i mezkûreye şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mûmâ-ileyh Abdülbaki Paşa bî-vech mu‘ârazadan men‘ olunup mâ-hüvel-vâki‘ bi’t-taleb ketb olundu. Fi’l-yevmi’s-sâmin min-şehri Şevvali’l-mükerrem li-sene seb‘a ve mie ve elf. Şuhûdü’l-hâl: Umdetü’l-vâ‘izîn Ahmed Efendi [b.] Vâ‘iz Mehmed Paşa, Umdetü’s-sâlikîn eş-Şeyh Yahya Efendi, Umdetü’l-eimme Ebûbekir Efendi İmâm-ı Kalenderhâne, Ahmed Efendi b. Şerefüddin, İsmail Efendi b. Ali, Derviş Ali Çelebi b. el-Hâc Mustafa, Abdi Çelebi sâkin-i Yenikapı, Durmuş Kethudâ, Mustafa Çelebi b. Ali Ağa, Abdurrahman Efendi halîfe-i muhâsebe, el-Hâc Salih Efendi huddâm-ı muhâsebe, Mustafa Çelebi b. Hasan, İsmail b. Murad, Abdullah Efendi el-imâm ve gayruhum mine’l-huzzâr.