İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 696 Hüküm no: 534 Orijinal metin no: [183b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’un çarşılarında güçlü kuvvetli ikişer bekçi tayin edilip sabaha kadar dolaşması, her on beş günde bir hane, han ve avlulardaki ocakların temizlenmesi, yatsıdan sonra dışarda gezilmemesi İstanbul kadısı izzetlü fazîletlü efendi hazretleri mahrûse-i İstanbul’un ba‘zı mahallâtında ve esvâkında mu‘tâd üzere bekçileri olmayıp olanların dahi ekseri ihtiyâr ve amel-mânde olup gezmeğe iktidârı olmadığı ecilden fesâda müeddî olmağla imdi mahallât ahâlîleriyle esnaf kethudâların getirdip her birine gereği gibi tenbîh eyleyesiz ki kadîmden bekçiler vaz‘ olunagelen yerlere yarar kefîlleriyle güçlü kuvvetli ikişer nefer tüvânâ bekçiler ta‘yîn ve mu‘tâd olan yerlerden fenerleri yakıp hudûdların sabaha değin gezmek üzere muhkem tenbîh ve te’kîd eyleyeler. Bundan sonra her kangı mahâl ve çarşıda mu‘tâd olan mahallerde vech-i meşrûh üzere ikişer nefer tüvânâ bekçiler bulunmaz ise imâmları ve esnaf kethudâları mu‘âteb olmaları mukarrerdir ve herkes sâkin olduğu hâne ve hân ve avlulardan her on beş günde bir def‘a ocakları tathîr edip mu‘tâd üzere nişânları kapıları önüne vaz‘ edip her bâr fermân ile tenbîh olunmağa muhtâc etmeyeler ve bundan böyle yatsıdan sonra fenerli eğer fenersiz kimesne taşrada gezinip her kim olur ise olsun ahz olunur ise hakkından muhkem gelinmek mukarrerdir, ona göre münâdîler nidâ etdirip âgâh eyleye deyü. Fî 18 [L.] sene [1]107