İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 697 Hüküm no: 535 Orijinal metin no: [183b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümâyûn tayinatı için gerekli olan ekmek bedellerinin İstanbul, Galata ve Üsküdar’dan tahsil edilerek hazineye teslimi Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devlet ve’l-ikbâl müşeyyidü erkâni’s-sa‘âdetü ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sa‘âdetimde Sadâret-i uzmâ ve vekâlet-i kübrâ kāimmakāmı olan vezîrim ( ) paşa -edâmallâhu te‘âlâ iclâlehû- ve a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü’l-müşkilâti’d-dîniye hallâlü’l-mufassalâti’l-yakīniye el-muhtassu bi-mezîd-i inâyeti’l-meliki’l-a‘lâ Anadolu kādıaskerliği pâyesiyle İstanbul kadısı olan Mevlânâ ( ) ve sâbıkā Rumeli kādıaskeri olup Üsküdar kadısı olan Mevlânâ ( ) -zîde fezailehumâ- ve akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ Galata kadısı ( ) -zîde fezailehû- tevkī‘-i refî‘-i hümâyûn vâsıl olucak ma‘lûm ola ki hâlâ işbu sene-i mübârekede vâki‘ sefer-i hümâyûnumda Dergâh-ı mu‘allâm kapı kulları ve sâir ta‘yînât için nân tabh eylemek üzere revende ekmekçi fırınlarının mühimmât-ı tabhiyeleri için şehr-i İstanbul’da sekiz aded fırın bedeli için dört bin guruş ve şehr-i Galata’da dört fırın bedeli iki bin guruş ve şehr-i Üsküdar’da üç fırın bedeli için bin beş yüz guruş tahsîli için bundan akdem emr-i şerîfim verilip ve menzil emîni Mustafa Ağa’nın İstanbul ekmekçilerinden Davutpaşa sahrâsında Dergâh-ı mu‘allâm yeniçerilerinin iki bin beş yüz otuz buçuk ve bir rub‘ guruşluk ekmek alıp ta‘yînâta tevzî‘ etmekle meblağ-ı mezbûr nân bahâları fırın bedellerine takās olunup ve Galata ihrâk olmak hasebiyle iki bin guruş fırın bedeliyeleri afv olunmak üzere telhîs olunup arz olundukda imdi mûcebince Galata’nın iki bin guruşunu ve İstanbul’un bin dört yüz altmış dokuz guruşu in‘âm olunmağla mütâlebe olunmayıp ancak iki bin beş yüz otuz buçuk guruşu ve Üsküdar’ın bin beş yüz guruş bedelleri tahsîl oluna deyü fermânım olup buyurdum ki, hükm-i şerîfimle vardıkda bu bâbda sâdır [olan] emrim üzere amel edip dahi vech-i meşrûh üzere Galata’nın iki bin guruşunu ve İstanbul’un bin dört yüz dokuz guruşunu in‘âm olunmağla mütâlebe olunmayıp ancak iki bin beş yüz otuz buçuk guruşunu ve Üsküdar’ın bin beş yüz guruş bedellerini tahsîl ve bir gün evvel teslîm-i Hazîne-i âmirem etdirmekde ziyâde dikkat ve ihtimâm eyleyesin şöyle bilesin, alâmet-i şerîfe i‘timâd kılasın. Tahrîren fi’l-yevmi’l-hâmis aşer min-şehri Şevvali’l-mübârek li-sene seb‘a ve mie elf. Be-makām-ı Edirne el-mahrûse.