İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 706 Hüküm no: 545 Orijinal metin no: [186b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da yangınların çok olması sebebiyle ahşap ev yapılmasına ruhsat verilmeyip taş, kireç ve çamur ile binaların yapılması buna uymayanların bildirilmesi İstanbul kadısı izzetlü ve fazîetlü efendi hazretleri İstanbul ve tevâbi‘inde vâki‘ büyût ve dekâkîn ve sâir ebniye müsta‘id-i âfet-i harîk olan elvâh ve ahşab ve pedavra ile binâ olunduğunda bi-kazâillâhi te‘âlâ def‘a be-def‘a ekserîsi muhterik olup ibâdullâh mutazarrır olmağla İstanbul’da ba‘de’l-yevm müceddeden hâne ve dekâkîn ve sâir ebniye murâd edenlerden bir ferd elvâh ve ahşab ve pedavra ile binâya ruhsat verilmeyip âfet-i harîkden mahfûz olmak için diyâr-ı Haleb ve Şam ve sâir Anadolu’da olan ebniye gibi herkes hâline göre taş ve kireç ve çamur ile binâ eyleyip ve kirpi saçak yapıp hâsılı binâ hususunda vukūf ve şu‘ûru olanlar ile bi-hıfzillâhi te‘âlâ âfet-i harîkden masûn olacak bir vech-i ma‘kūle ifrâğ eyleyip kemâ-yenbagī ihtimâm olunmak bâbında hatt-ı hümâyûn-ı şevket-makrûnla fermân-ı âlîşân sâdır olmağın imdi vârid olan emr-i celîlü’ş-şânı sicill-i mahfûza kayd ve hâssa mi‘mâr ağa ile sâir binâ umûruna karışanlara muhkem tenbîh ve te’kîd eyleyesiz ki fîmâ-ba‘d müceddeden hâne ve dekâkîn ve sâir ebniye murâd edenlerden bir ferd elvâh ve ahşab ve pedavra ile binâya ruhsat verilmeyip âfet-i harîkden mahfûz olmak için diyâr-ı Haleb ve Şam hâsılı Anadolu’da olan ebniye gibi herkes hâline göre taş kireç ve kerpiç ve çamur ile binâ eylemek üzere sâdır olan fermân-ı âlîşânın mazmûn-ı münîfi icrâsına ihtimâm edip memnû‘ olmayanları isim ve resimleriyle i‘lâm eyleyeler deyü buyruldu. Fî 15 Za sene [1]107.