İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 708 Hüküm no: 547 Orijinal metin no: [187a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atik Valide Sultan Evkafı’na ait Kocaeli’nde bulunan mandıra mahsulünden eskiden olduğu gibi vergi alınmaması ve görevlilerine müdahale edilmesi Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sa‘âdetimde Sadâret-i uzmâ ve vekâlet-i kübrâ kāimmakāmı olan vezîrim ( ) paşa -edâmallâhu te‘âlâ iclâlehû- ve akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, iftihârü’l-havâs ve’l-mukarrebîn mu‘temedü’l-mülûk ve’s-selâtîn muhtârü’l-izzü ve’t-temkîn bi’l-fi‘il dârü’s-sa‘âdetim ağası olup Haremeyn-i muhteremeyn Evkāfı nâzırı olan el-Hâc Ali Ağa -dâme ulüvvühû- Dîvân-ı hümâyûnuma arzuhâl gönderip taht-ı nezâretlerinde olup Üsküdar’da vâki‘ merhûme ve mağfûrun-lehâ Atîk Vâlide Sultân Evkāfı’ndan Kocaili sancağında yaylakda vâki‘ mandırasında olan ağnamın südlerinden hâsıl olan peynir gerek kaşkul ve gerek hellim peynirleridir, İstanbul’a geldikde gerek emîn olanlar resm-i gümrük nâmıyla bir akçe ve bir habbe taleb etmeyip ve bâc-ı pazar ve kapı akçesi talebiyle rencîde ve Üsküdar ve İstanbul pazarbaşıları ve dîdebânları ve kolcuları ve yasakçıları ve vakfın mandıralarına hizmet eden iki nefer Yahûdî ve vakfın hizmetkârlarına müdâhale ve rencîde olunmaya deyü mukaddemâ verilen emr-i şerîf tecdîd olunmak recâsına [187b] i‘lâm etmeğin imdi mazmûn-ı mesfûr üzerine mukaddemâ verilen hükm-i hümâyûnum mûcebince amel edip hilâfına kat‘an rızâ ve cevâz göstermeyesin şöyle bilesin ve ba‘de’n-nazar bu hükm-i hümâyûnumu yedlerinde ibkā edip alâmet-i şerîfe i‘timâd kılasın. Tahrîren fi’l-yevmi’l-hâmis min-şehr-i Zilka‘deti’ş-şerîfe li-sene seb‘a ve mie ve elf. Be-yurd-ı sahrâ-yı Edirne.