İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 708 Hüküm no: 548 Orijinal metin no: [187b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuğcuların bozuk tuğ yapmaları sanatın yok olmasına sebebiyet vereceğinden, bundan sonra tuğların sadece sanat erbabı tarafından yapılması Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, hâssa tuğcularım başı olan kıdvetü’l-emâcid ve’l-a‘yân Murtaza -zîde mecduhû- Dergâh-ı mu‘allâma arzuhâl edip ehl-i sûk işleyip mîrîye verdikleri tuğları kalb işlemeleriyle zamân-ı kalîlde fenâ bulup ve hırfetlerin tomrukdan yapmayıp ıhlamur dalından yapmalarıyla eğilip ve tuğların fervelerin mu‘tâddan noksan yapıp ve istedikleri bahâya füruht eyleyip ve tuğlar alınıp verildikde tuğcubaşıya mürâca‘at etmeyip te‘addî ve tecâvüz üzere olmalarıyla mezbûrlar umûrlarında tuğcubaşıya mürâca‘at edip ol vechile te‘addî ve tecâvüz ve ihltilâlden ihtirâz olunup mukaddemâ verilen emr-i şerîf mûcebince amel oluna deyü merhûm ve mağfûrun-leh amm-i cennet-mekânım Sultân Ahmed Han -tâbe serâhu- zamanında emr-i şerîf vermekle müceddeden hükm-i hümâyûnum recâ etmeğin vech-i meşrûh üzere amel olunmak emrim olmuşdur. Buyurdum ki, vusûl buldukda bu bâbda sâdır olan emrim üzere amel edip dahi mezbûrlara muhkem tenbîh ve te’kîd eyleyesiniz ki kalb tuğ işlemeyip ve hırfetlerin hâlis ve kuru tomrukdan yapıp ve tuğlar alınıp verilirken tuğcubaşı ma‘rifetiyle verilip ve hâm-dest olanlar san‘atlarına karışmayıp ihtilâle bâ‘is olmayıp bu bâbda sâdır olan emr-i şerîfimin mazmûn-ı münîfi ile âmil olasın, şöyle bilesin ve ba‘de’n-nazar bu hükm-i hümâyûnumu yedinde ibkā edip alâmet-i şerîfe i‘timâd kılasın. Tahrîren fî evâhir-i şehr-i Receb li-sene sitte ve mie ve elf. Be-makām-ı Edirne el-mahrûse.