İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 709 Hüküm no: 549 Orijinal metin no: [187b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümayun için Anadolu tarafından gelen bazı askerlerin Üsküdar ve İstanbul’da sefere katılmamak için sanat erbabı gibi hareket edip gizlendikleri belirlendiğinden bunlara izin verilmemesi İstanbul kadısı izzetlü ve fazîletlü efendi hazretleri işbu sene-i mübârekede sefer-i hümâyûna memûr olup Anadolu cânibinden gelen tavâyif-i askerînin ba‘zıları Üsküdar ve İstanbul ve tevâbi‘i kazâlarına geldiklerinde mücerred sefere gitmemek için kalpakçılık ve ba‘zı sanâyi‘ işlemek bahânesiyle kıyâfetlerin tebdîl edip birer tarîkle miknet ve ârâm eyledikleri sem‘-i hümâyûna ilkā olunmağla ol makūlelere kat‘an ruhsat vermeyip bir gün evvel ihrâc ve fîmâ-ba‘d gelenleri bir günden ziyâde miknet etdirmeyip Ordu-yı hümâyûna irsâl olunmak bâbında emr-i celîlü’ş-şân vârid olmağın imdi husûs-ı mezbûra gereği gibi tekayyüd edip dahi mahallât ahâlîleri esnaf kethudâların ve hancıları ve bekâr odalarının odabaşıların şer‘-i şerîfe ihzâr ve muhkem tenbîh ve te’kîd eyleyesiz ki yeniçeri cebeci ve topçu ve sâir askerî tâifesinde eğer mukīm ve eğer müsâfirdir sefer-i hümâyûna memûr olanları bir gün evvel ihrâc ve irsâl edip bir ferde himâye etmekde ihtirâz eyleyeler şöyle ki, bundan sonra mahallât ve esnaf aralarında ve hanlarda ve bekâ[r] odalarında gerek mukīm ve gerek müsâfir sefere memûr olan askerî tâifesinden bir ferd bulunursa ahz ve cezâları tertîb olunduğundan gayrı her kim ki mahallesinden gayrı ve esnafında ve hâne ve odalarında bulunur ise ahâlîlerinin cihâtları âhara verilip kendilerin ve esnaf kethudâları ve hancı ve odabaşılarının eşedd-i ukūbet ile haklarından gelinmek mukarrerdir, ona göre cümlesine muhkem tenbîh ve te’kîd ve nidâ ve teşdîd etdirip tenbîh olmayanları ahz ve huzûrumuza ihzâr edip hilâfından ihtirâz eyleyeler deyü buyruldu. Fî 2 Z sene [1]107.