İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 717 Hüküm no: 556 Orijinal metin no: [190a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa ve diğer ecnebilerin işlerini gören Hacı Ebubekir’e Hacı Ali tarafından yapılan müdahalenin engellenmesi Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sa‘âdetimde bi’l-fi‘il Sadâret-i uzmâ ve vekâlet-i kübrâ kāimmakāmı olan vezîrim Osman Paşa -edâmallâhu te‘âlâ iclâlehû- ve a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü’l-müşkilâti’d-dîniye hallâlü’l-mufassalâti’l-yakīniye miftâhu künûzi’l-hakāyık messâhu rumûzi’d-dekāyık el-mahfûfu bi-sınûfi avâtıfi’l-meliki’l-a‘lâ Anadolu kādıaskerliği pâyesiyle İstanbul kadısı olan Mevlânâ Abdullah -edâmallâhu te‘âlâ fezailehû- tevkī‘-i refî‘-i hümâyûn vâsıl olucak ma‘lûm ola ki, kıdvetü’l-ümerâi’l-milleti’l-Mesîhiyye Françe pâdişâhının Âsitâne-i sa‘âdetinde mukīm elçisi Baron de Şatonf -hutimet avâkıbuhû bi’l-hayr- Ordu-yı hümâyûnuma arzuhâl gönderip bundan akdem hüccet-i şer‘iye ve emr-i şerîf ile İngilterelülerin mahsûs sâ‘îleri olan el-Hâc Ebûbekir nâm sâ‘înin tekâsülü olmayıp ve her vechile mu‘temedün-aleyh ve müstakīm iken âhardan Hacı Ali nâm sâ‘î müdâhale etmekle merkūm Hacı Ebûbekir Franca ve sâir müste’men tâifesinin dahi mahsûs sâ‘îsi olup merkūm Hacı Ali’yi ve âharı umûruna müdâhale etdirilmemek bâbında hükm-i hümâyûnum recâ eylediği ecilden ahkâm kaydına müraca‘at olundukda vech-i meşrûh üzere olduğu mastûr ve mukayyed bulunmağın mukaddemâ verilen emr-i şerîf mûcebince amel olunmak emrim olmuşdur. Buyurdum ki, hükm-i şerîfim vusûl buldukda bu bâbda sâdır olan emrim üzere amel edip dahi mezbûr Hacı Ebûbekir’i yedinde olan hüccet-i şer‘iye ve emr-i şerîf mûcebince Franca ve sâir müste’men tâifesinin mahsûs sâ‘îsi olup mezbûr-ı merkūm Hacı Ali’yi ve âharı umûruna müdâhale ve mu‘âraza etdirmeyip vârid olan emr-i şerîfimin mazmûn-ı münîfi ile âmil olasın, şöyle bilesin, alâmet-i şerîfe i‘timâd kılasın. Tahrîren fî evâili Zilka‘deti’ş-şerîfe li-sene seb‘a ve mie ve elf. Be-yurd-ı sahrâ-yı Edirne.