İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 719 Hüküm no: 559 Orijinal metin no: [191a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sürücübaşı Yorgaki’nin casusluk yaptığı ortaya çıktığından haps edilerek mallarına el konulduğu ve alacak vereceklerinin mîrî tarafından takip edildiği Kıdvetü ümerâi’l-milleti’l-Mesîhiyye umdetü küberâi tâifeti’l-Îseviye Boğdan voyvodası olan Kostantin -hutimet avâkıbuhû bi’l-hayr- tevkī‘-i refî‘-i hümâyûn vâsıl olucak ma‘lûm ola ki bundan akdem sürücübaşı olan Yorgaki zimmînin hat ve hatmi ile a‘dâ-yı dîn ü devletim tarafına câsûsluk ile mektûbları dutulup habâseti zâhir olmağla hâlen tertîb-i cezâ için ahz u habsolup bi’l-cümle emvâl ve erzâkı cânib-i mîrîden zabtolunmağın defterlerinin iktizâsı ve âdemlerinin ihtiyârı mûcebince zimemi tahsîl olunmak lâzım gelmeğin mukaddemâ sana ber-vech-i nakd karz verdiği akçeden hâlâ zimmetinde olan on altı bin guruşu ta‘yîn olunan mübâşire teslîm edip ve bu def‘a kethudâsı olan İzmirli Yorgi zimmî vilâyet-i Boğdan’dan koyun mübâya‘ası için gönderdiği ( ) guruşluk mikdârı akçeyi mezbûr Yorgi zimmîyi ahz u habs ve elinde olan nukūd akçeyi bi’t-tamam ahz ve mevcûd olan koyunu ve akçesi verilip hâlen kendüye teslîm olunmayıp ashâbı yedinden olan ağnamı bi’l-cümle vücûda getirip mübâşir-i merkūm ma‘rifetiyle kasabbaşı tarafından gönderilen âdemîsine teslîm ve husûs-ı mezbûrun keyfiyetini icâleten i‘lâm edip gerek nukūd ve gerek koyunlarını bir dürlü ketm ve ihtifâ etdirmeyip husûs-ı mezbûrda bir dürlü tekâsül ve tehâvün eylemekden be-gāyet ihtirâz eyleyesin deyü fermân olmuşdur. Buyurdum ki, hükm-i şerîfimle vardıkda bu bâbda sâdır olan emrim üzere amel edip dahi sen ki voyvoda-i mesfûrsun mesfûr sürücübaşı Yorgaki zimmînin defterlerinin iktizâsı ve âdemlerinin ihbârı mûcebince zimemi tahsîl olunmak lâzım gelmekle mukaddemâ sana ber-vech-i nakd karz verdiği akçeden hâlâ zimmetinde olan on altı bin [guruşu] işbu emr-i şerîfim vardığı gibi tedârük ve mübâşir-i mezbûra teslîm edip ve bu def‘a kethudâsı olan İzmirli Yorgi zimmî ile ve yedinde Boğdan’da koyun mübâya‘ası için verdiği ol mikdâr guruşluk akçeyi mezbûr Yorgi zimmîyi ahz u hasb ve elinde mevcûd olan nukūd akçeyi bi’t-tamam ahz ve mevcûd olan koyunu ve akçesi verilip hâlâ kendüye teslîm olunmayıp esmânı yedinde olan ağnamı bi’l-cümle vücûde getirip mübâşir-i merkūm ma‘rifetiyle kasabbaşı tarafından gönderilen âdemîsine teslîm ve husûs-ı mezkûrun keyfiyeti icâleten i‘lâm edip gerek nukūdun ve gerek koyunlarını bir dürlü ketm ü ihtifâ edip ve zimmetinde olan akçeyi dahi bir gün ve bir sâ‘at mukaddem tedârük ve teslîm eylemekde tekâsül ve tehâvün ve ta‘vîk ve te’hîrden be-gāyet ihtirâz edip sâdır olan fermân-ı âlîşânımın mazmûn-ı münîfi ile âmil olasın, şöyle bilesin, alâmet-i şerîfe i‘timâd kılasın. Tahrîren fi’l-yevmi’r-râbi‘ aşer şehri Şa‘bâni’l-mu‘azzam sene [1]106. Edirne el-mahrûse.