İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 53 Hüküm no: 17 Orijinal metin no: [3a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İskele ve kapanlardaki hamalların nizamlarına uygun olarak çalışmaları Ma‘rûz-ı dâ‘î-i kemîneleridir ki Zikr olunan hammâl tâifesinin küfelâsı mahallerinde ba‘de’t-tescîl cümle bölükbaşıları meclis-i şer‘a ihzâr olunup ba‘de’l-yevm tâife-i mezbûre bâlâda tahrîr olunan narhlarından ziyâde talebi ile ibâdullâhı rencîde ve ta‘cîz etmeyip ve isti‘mâl ettikleri bârgirleri na‘lsiz olmayıp ve ba‘de’l-asr davarlarına yük tahmîl olunmayıp ve sürücüleri sıbyândan olmayıp uhdesinden gelen sürücü istihdâm olunup ve’l-ıyâzu billâhi te‘âlâ vâki‘ olan harîklerde ib[â]dullâhın emvâl ve eşyâsı zâyi‘ ve telef olunmayıp eğer hammâl tâifesi ahz ve firâr ile zâyi‘ olursa kefîli olan bölükbaşısından tazmîn olunup ve’l-hâsıl ibâdullâh bir nev‘ mutazarrır olmamak üzre cümlesine tenbîh ve te’kîd olundukda onlar dahi râzı ve müte‘ahhid olmalarıyla beynlerine nizâm verilip bu nizâm ba‘de’l-yevm beynlerinde cârî ve düstûrü’l-amel olunmak bâbında defter-i mezkûr bâlâsına fermân-ı âlîleri ihsân buyurulmak bâbında fermân men lehü’l-emr hazretlerinindir. Fî evâhiri Recebi’l-ferd sene 1138. Hurrire hâze’d-defter bi emri men lehü’l-emri’l-âlî -eyyedehullâhu bi’n-nasri’l-azîz ale’t-tevâlî- bi ma‘rifeti’l-abdi’l-fakīr Kethüdâzâde Mehmed el-kadı bi Dâri’l-hilâfeti’l-uzmâ ve makarri’s-saltanatihi’l-kübrâ -lâ-zâle mansûren ale’l-muhâlifîn fi’l-evlâ ve’l-ecrâ hâssa bi lutfihi’l-hafiyyi’l-eltâf fi’l-âhire ve’l-ûlâ-.