İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 112 Hüküm no: 48 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eminönü’ndeki Üsküdar kayıkçıları kethüdâsının görevini layıkıyla yapması Kayık i‘lâmı İstanbul’da Eminönü’nde olan Üsküdar kayıkçıları tâifesi üzerlerine Hasan b. Resûl ve Ali b. Mahmud nâm kimesneler kethüdâ olup umûr-ı mühimme vâki‘ oldukda zâbit ve hükkâm tarafından suâl ve cevâb için sayf ü şitâda biri İstanbul’da ve biri Üsküdar’da bekleyip vaktiyle bulunmak üzre beynimizde nizâm verilip mûcebince fermân-ı âlî dahi sâdır olmuşiken, mezbûr Hasan kethüdâlık-ı mezbûru beklemeyip umûr-ı mühimmenin ta‘tîline bâ‘is olur deyû tâife-i mezbûre iddi‘â ettiklerinde mezbûr Hasan dahi on bir aydan beri hasta ve sâhib-i firâş olmuşdum deyip ba‘de’l-yevm hizmet-i mezbûreye mücidd ü sâ‘î olup kat‘â terk etmeyip vaktiyle mahallinde bulunmak şartıyla mezbûr Hasan’a ber mûceb-i fermân-ı âlî kıbel-i şer‘den tenbîh ve huzûr-ı âlîlerine i‘lâm olundu. Fî 23 Şevvâl sene [1]138.