İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 113 Hüküm no: 49 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bıçakçı ve kalemtıraşçıların gediğine dışarıdan müdahale edilmemesi Kalemtraş i‘lâmı Ma‘rûz-ı dâ‘î-i devletleridir ki Mahmiye-i İstanbul’da bıçakçı ve kalemtraşçı tâifelerinin kethüdâları olan sâhib-i arzuhâl İzzetî Mustafa meclis-i şer‘de şöyle takrîr-i kelâm eyledi ki bizim metâ‘ımız olan balık dişi ve fildişi ve abanoz ve bunun emsâli metâ‘ımız taşradan geldikde bir iki muhtekir zimmîler hafiyyeten alıp der mahzen ve ihtikâr eylediklerinden sonra esnâfımız bi’l-iktizâ iştirâ eylediklerinde muhtekir-i mezbûrlar asl-ı malına iki kat madde zam ve ondan sonra fâide talebi ile esnâfımızı dâimâ ızrâr ederler, ba‘de’l-yevm metâ‘ımız taşradan geldikde asl-ı sermâyesi ma‘lûm olmak için kethüdâ ve ihtiyâr ustalarımız ma‘rifetleriyle cümle beyninde akd ve pazar olunup kifâyet mikdârı esnâfımız aldıkdan sonra mâ‘adâsını zimmî-i mezbûrlar yine cümle beyninde semen-i ma‘lûma iştirâ eyleyeler mâdâm ki esnâf-ı mezbûra erbâbı almadan muhtekir-i mezbûrlara verilmemek bâbında hükm-i hümâyûnu nâtık fermân-ı âlîleri recâsında olduğu huzûr-ı âlîlerine i‘lâm olundu. Fî 22 Şevvâl sene [1]138.