İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 115 Hüküm no: 53 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mehmed’in Sulumanastır’daki kasap dükkânı gediğinin Hasan’a verildiği Kasab gediği Ma‘rûz-ı dâ‘î-i devletleridir ki Sâdır olan fermân-ı âlîlerine imtisâlen derûn-ı arzuhâlde mastûr olan kasab dükkânı husûsu izzetlü yeniçeri ağası hazretleri ve kethüdâları ve atîk ustaları ma‘rifetleriyle şer‘le görüldükde, kadîmü’l-eyyâmdan mezbûrların nizâmları bir kasab ustası fevt oldukda tasarrufunda olan kasab dükkânı gediği nâzırları olan izzetlü yeniçeri ağası ve kasablar kethüdâsı ve ihtiyâr ustalar ma‘rifetleriyle evlâd-ı zükûru kalırsa evlâdına ve evlâd-ı zükûru kalmazsa ağa-yı mûmâ-ileyh ve kethüdâ ve ustaları ma‘rifetleriyle bir müstahıkka verilegelmekle merhûm Kara Mustafa Paşa Yedikule kapısı hâricinde vâki‘ müceddeden binâ ve vakfeylediği selhhâneler mülhakātından on üçüncü selhhâneye mülhak olup mahmiye-i İstanbul’da Sulumanastır kurbunda sebîlhâne köşesinde olan bir bâb kasab dükkânı gediğine mutasarrıf olan Mehmed fevt oldukda, nâzır-ı mûmâ-ileyh ve kethüdâ ve ihtiyâr ustaları ma‘rifetleriyle sâhib-i arzuhâl Hasan’a verilip üzerinde iken, Ali nâm kimesne hilâf-ı nizâm ben dükkân-ı mezbûrun gediğini mütevellîden temessük ile aldım zabt ederim deyû bî-vech müdâhale ve nizâm-ı kadîme halel verip mezbûrların nizâm-ı kadîmleri mürâ‘ât olunmazsa ahvâlleri muhtel ve müşevveş ve narh-ı cârîye halel ve ibâdullâhı ızrâr ve iz‘âc mukarrer olmağın, dükkân-ı mezbûrun gediği nâzırları olan izzetlü yeniçeri ağası ve kethüdâları ve ihtiyâr ustaları ma‘rifetleriyle mezbûr Hasan’a zabt ve yedine hükm-i hümâyûnu nâtık fermân-ı âlî buyurulursa indallah müsâb ve me’cûr olurlar. Fî 29 Şevvâl sene [1]138.