İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 126 Hüküm no: 62 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul kebeci esnafının işlerine dışarıdan müdahale edilmemesi Ma‘rûz-ı dâ‘î-i devletleridir ki Mahmiye-i İstanbul’da kebeci tâifesinin kethüdâları el-Hâc Osman b. Mehmed ve ustalarından el-Hâc Mustafa b. Osman ve el-Hâc Süleyman b. Hasan ve Mustafa b. Osman ve İsmail b. İbrahim meclis-i şer‘de mahmiye-i mezbûrede mahberci tâifesinden es-Seyyid İsmail b. Receb ve el-Hâc İbrahim b. Murad ve Ahmed b. Mahmud mahzarlarında bizim nizâm-ı kadîmimiz taşradan İstanbul’a kebe geldikde doğru Uzun çarşıda vâki‘ Kilihanı’na ve Sulu Han’a gelip kethüdâmız ve ustalarımız ma‘rifetleriyle cümle ustalara tevzî‘ ve taksîm olunagelip mahberci ve kuşakçı ve muhtekir ve koltukçu tâifesi karışmayıp nizâm-ı hâlimiz bu vech üzre muntazam iken işbu mezbûrûn mahberci tâifesinden olmalarıyla metâ‘ımız olan kebede alâkaları olmayıp dahl îcâb etmez iken mezbûrûn mahberci tâifesi bu yakīnde metâ‘ımız olan kebeyi hafiyyeten alıp der mahzen ve ihtikâr ve semen-i mislinden ziyâde bahâ ile ibâdullâha bey‘ etmeleriyle nizâmımıza ihtilâl ve ibâdullâhı ızrâr ederler hâlâ men‘ olunmaları matlûbumuzdur deyû da‘vâ eylediklerinde mezbûrûn dahi ikrâr ve i‘tirâf etmeleriyle ba‘de’l-yevm müdde‘ûn-ı mezbûrûnun metâ‘ları olan sâlifü’z-zikr kebeye karışmayıp bâ‘is-i ihtilâl ve ibâdullâhı ızrâr etmemek üzre merkūmûn mahberci tâifesine taraf-ı şer‘den tenbîh olunduğu huzûr-ı âlîlerine i‘lâm olundu. Bâkī emr men lehü’l-emrindir. Hurrire fî selhi Şevvâl sene [1]138.