İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 128 Hüküm no: 64 Orijinal metin no: [19b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sahte bakırdan eşya imal edilmemesi Bakırcı i‘lâmı Ma‘rûz-ı dâ‘î-i devletleridir ki Mahmiye-i İstanbul’da Unkapanı dâhilinde bakırcı tâifesi işçilerinin kethüdâsı Mehmed b. Mehmed ve Sultân Bayezid’de bakır füruht eden bakırcı tâifesinin kethüdâsı Seydî Mehmed b. İbrahim ve tâife-i mezbûreden İbrahim b. Ali ve Mehmed b. Hasan ve Mustafa b. el-Hâc Abdülbâkī ve Süleymaniye’de dökmeciler kethüdâsı İsmail b. Mahmud ve yiğitbaşı Mehmed b. Ali ve üstâdlarından el-Hâc Mustafa b. Ömer ve Mustafa b. Halil meclis-i şer‘-i şerîfde takrîr-i kelâm ve bast-ı merâm edip ba‘zı bakırcı tâifesi kallâb olup işledikleri kalb evânî ednâ isti‘mâl ile delinip helâk olmağla kalb işleyenler men‘ ve def‘ olunmak bâbında sâdır olan fermân-ı vâcibü’l-ittibâ‘a imtisâlen fîmâ ba‘d atîk bakırdan kazaruma ta‘bîr olunan evânî atîk olduğu ma‘lûm olmak [20a] için kalaylanmadıkça dükkânlara vaz‘ ve füruht olunmaya ve ba‘zı dört beş mahallinden yamalı olup kara meremmeti ta‘bîr olan evânî hurda mesâbesinde olmağla füruht olunmayıp kesr oluna ve cedîd olan bakırlardan pastırma ta‘bîr olunup çekiç ile basdırılan bakırlar dahi sakat ve ma‘yûb olmağla ol dahi füruht olunmayıp kesr oluna ve kazan ve güğüm ve bakracın kaynadması pâk ve sağ ve kavî ola ve tencere ve sahan ve ibrik envâ‘ı ve leğen ve hoşâb tası ve sâir bi’l-cümle bakırlar (…) ve sakat ve ma‘yûb olmaya ve eğer bu misillü ma‘yûb bakırlar bulunursa kesr oluna ve tuçdan dökme sahanlar dahi kâr-ı kadîm üzre iki sınıf olup bir sınıfının dördü bir vakıyye ve bir sınıfının üçü bir vakıyye olup kalaylı ola ve bu senenin bakır sahanından fark olmak için düz şeşhâne ola ve tuç sahan husûsunda bakırcılar kethüdâları dökmeciler esnâfa nezâret edeler deyû kavl ü vifâk ve ahd ü mîsâk eyledik dedikleri bi’l-iltimâs huzûr-ı âlîlerine i‘lâm olundu. Bâkī emr hazret-i veliyyü’l-emrindir. Hurrire fî gurreti Zilka‘de sene [1]138.