İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 133 Hüküm no: 71 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Berş’in sadece iki dükkânda satılacağı ve narhı Bâ sah İ‘lâmları mûcebince amel olup bundan ziyâdeye verdikleri istimâ‘ olunursa ta‘zîr olunmaların mukarrer bileler deyû buyruldu. Berş i‘lâmı Mahmiye-i İstanbul’da vâki‘ Mahmud Paşa sûkunda berş tabh ve bey‘ eden rahîkaynin iki bâb dükkânlarından mâ‘adâ mahmiye-i mezbûrede berş tabh ve bey‘ eden muhdes dükkânlar ta‘tîl ve tabhdan men‘ olunmaları bâbında bundan akdem tuğrâ-yı garrâ ile mu‘anven sâdır olan fermân-ı âlîşân mûcebince zikr olunan iki bâb rahîkī dükkânlarından mâ‘adâ muhdes olan dükkânlar men‘ ve ta‘tîl olunmak takrîbiyle Memâlik-i Mahrûse’de bey‘ ü şirâ olunan berş ancak zikr olunan iki bâb dükkânlara maksûr olmağın, menâfi‘ ve îrâdları evvelkinin ez‘âf ü muzâ‘afı olduğuna binâen bey‘ eyledikleri berş’in dahi bahâsı tenkīs ve tenzîl olunmak iktizâ etmekle, fîmâ ba‘d zikr olunan iki dükkânda bey‘ olunan berş’in beher vakıyyesi yüz ellişer akçeye bey‘ olunup ziyâdeye bey‘den men‘ olunmaları bâbında fermân-ı âlîleri ihsânıyla mübtelâsı olan ibâdullâhı himâyet buyurmakla nâil-i ecr-i cezîl olmaları emr-i mukarrerdir. Bâkī emr ü fermân hazret-i veliyyü’l-emrindir. Fî 4 Zilka‘de sene [1]138.