İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 135 Hüküm no: 74 Orijinal metin no: [21b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Osman b. Şaban’ın mürekkepçiler kethüdâlığına tayini Allahü hasbî Mâ fîh kemâ fîh, harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mürekkeb hücceti Mahmiye-i İstanbul’da mürekkebçi hırfetinin savb-ı şer‘den mansûb kethüdâları olmayıp hırfet-i mezbûreye kıbel-i şer‘den bir kethüdâ nasb ve ta‘yîn olunmak lâzım ve mühim olmağın, hırfet-i mezbûre ihtiyârlarının mukaddemâ kethüdâ ittihâz ettikleri işbu râfi‘ü’l-kitâb Molla Osman b. Şaban her vechile kethüdâlık-ı mezbûre uhdesinden gelmeğe kādir ve mahal ü müstahık olduğunu yine hırfet-i mezbûre ustaları meclis-i şer‘de ihbâr etmeleriyle, hâkim-i muvakki‘-i sadr-ı kitâb tûbâ-lehû ve hüsnü me’âb hazretleri dahi mezbûr Molla Osman’ı hırfet-i mezbûre üzerlerine savb-ı şer‘den kethüdâ nasb ve ta‘yîn buyurduklarında, ol dahi kabûl ve hizmet-i lâzımesin kemâ yenbağī edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’t-tâsi‘ min Zilka‘deti’ş-şerîfe sene [1]138. Şuhûdü’l-hâl: Mehmed Ağa b. Mehmed, Sâlih Çelebi b. Süleyman, Mehmed Çelebi b. Abdullah, Hüseyin b. el-Hâc Mehmed.