İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 136 Hüküm no: 75 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’a odun getiren gemilerin vergilerini ödemeleri Sefâinden resm-i mîrî Ma‘rûz-ı dâ‘î-i devletleridir ki Mahmiye-i İstanbul İhtisâb mukāta‘ası emîni meclis-i şer‘de sefîne reislerinden Samatyalı el-Hâc Ahmed ve Çatladıkapılı İsmail ve Hasan ve Mehmed ve Davudpaşa’dan Musa ve Ahmed ve Ahırkapı’dan el-Hâc Nebi ve Herekeli Mustafa ve Şileli Bıyıklı Hasan ve Bandırma Kethüdâsı el-Hâc Receb ve Mihaliç Kethüdâsı ve Yalakābâd kethüdâsı el-Hâc Hasan ve Karamürsel kethüdâsı Veli ve Mehmed ve sâirleri mahzarlarında Akdeniz ve Karadeniz câniblerinden mahmiye-i mezbûra meyve ve sâir zahîre getiren sefâin ashâbı yedimde olan fermân-ı âlîyle ta‘yîn ve tasrîh olunduğu üzre resm-i mîrîlerin edâ edip ancak odun getiren mezbûrûn reisler üç seneden beri bâ fermân-ı âlî ta‘yîn olunan her bir sagīr sefîneden on altı para resimlerini edâda ta‘allül ve nizâ‘ etmeleriyle fîmâ ba‘d bir türlü nizâ‘ ve husûmete müeddî olmayıp mâl-ı mîrîye kesr ve zarar terettüb etmemek vechi üzre bir sûret-i müstahseneye ifrâğ olunmak bâbında izzetlü defterdâr Efendi telhîsi mûcebince vârid olan fermân-ı âlîye imtisâlen mezbûrûn reisler istintâk olunup cevâbları tahrîr ve i‘lâm olunmak matlûbumdur dedikde, mezbûrûn reisler cevâblarında ancak odun için isti‘mâl eyledikleri çekmeden çekmeye on ikiden on altı zirâ‘a varınca sagīr sefîneden on sekiz akçe resm-i mîrî ve on altıdan on sekiz zirâ‘a varınca vasat sefîneden otuz altı akçe mîrî ve altı akçe harc ve on sekizden yirmiye varınca kebîr sefîneden elli dört akçe resm-i mîrî ve elli akçe harc ve saman ve kömür getirdiklerinde bir guruş resim verip fîmâ ba‘d zikr olunan resimlerini cânib-i mîrîye edâda muhâlefet etmemek üzre her biri kabûl ve ber vech-i muharrer kavl ü ittifâk ve ahd ü mîsâk ettiklerinde emîn-i mûmâ-ileyh dahi râzı olduğu ba‘de’t-tescîl rüesâ tâifesinin ber minvâl-i meşrûh ve ta‘ahhüd ve ittifâkları düstûrü’l-amel olup hilâfına tasaddî edenlerden bâlâda mezkûr resm-i mîrîleri izzetlü yeniçeri ağası ma‘rifetiyle tahsîl olunmak bâbında emîn-i mûmâ-ileyhe fermân-ı âlî recâsında idiği huzûr-ı âlîlerine i‘lâm olundu. Fî gurreti Zilka‘de sene [1]138.