İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 140 Hüküm no: 78 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıkçılar kethüdâsı Mustafa Beşe’nin sıra beklemeksizin iskelelerden yolcu alabileceği Kayıkçı i‘lâmı Ma‘rûz-ı dâ‘î-i devletleridir ki Beşiktaş ve Ortaköy ve tevâbi‘i iskelelerinde olan kayıkçı tâifesinin kethüdâları olan Mustafa Beşe’nin kayığı nevbet ve nizâm defterine dâhil olmayıp kethüdâ-yı mezbûrun zahmet ve meşakkati kesîr ve îrâd ve intifâ‘ı kalîl olmağla bir mikdâr medâr-ı ma‘âşa muhtâc olduğunu tâife-i mezbûre inhâ etmeleriyle, kethüdâ-yı mezbûrun kayığı her kangı iskeleye varırsa nevbet i‘tibâr olunmayıp ber vech-i mu‘tâd alageldiği mikdâr âdem almasına sâir kayıkçılar mümâna‘at etmemek üzre yedine fermân-ı âlîleri ihsân buyurulmak recâsında olduğu huzûr-ı âlîlerine i‘lâm olundu. Fermân men lehü’l-emrindir. Fî 12 Zilka‘de sene [1]138.