İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 152 Hüküm no: 83 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nişastacı esnafı olmayan Hüseyin’in esnafın işlerine karışmaması Nişastacılar i‘lâmı Ma‘rûz-ı dâ‘î-i devletleridir ki Nişastacı tâifesinin kethüdâları Abdurrahman ve sâir esnâf-ı mezbûre ihtiyârları meclis-i şer‘de sâhib-i arzuhâl Hüseyin muvâcehesinde mezbûr Hüseyin san‘at-ı mezbûre erbâbından olmayıp hâm-dest olup dâimâ nişasta işleyip a‘lâ olmak üzre bey‘ etmek âdeti olduğundan mâ‘adâ kârhânemiz ahâlîsi kendiden müteezzî olmalarıyla kirâren ve mirâren taraf-ı şer‘den tenbîh olundukda mütenebbih olmayıp ibâdullâhı ızrâr etmekle, işbu yedimizde olan birkaç kıt‘a i‘lâmlar nâtık olduğu üzre umûmen kendiden teşekkî ve sû-i hâli ihbâr olunmakla men‘ olunmuşdu deyû takrîrlerine mutâbık senedât ibrâz eyleyip ve ba‘de’l-yevm mezbûr içlerinden ihrâc ve işlerine karışmayıp müdâhaleden men‘ olunmak üzre fermân-ı âlî iltimâs eyledikleri huzûr-ı âlîlerine i‘lâm olundu. Fî 16 Zilka‘de sene [1]138.