İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 152 Hüküm no: 84 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerbetçilere kar veren karcıların karlarını beş ayrı mahzende saklamaları Şerbetçi Bâ mühr-i hazret-i Efendi Ma‘rûz-ı dâ‘î-i devletleridir ki İstanbul’da şerbetçi tâifesinin kethüdâları el-Hâc Ahmed ve yiğitbaşıları Mehmed ve ustalarından es-Seyyid Mustafa ve es-Seyyid İbrahim ve Süleyman ve Molla Osman ve Molla Mehmed ve Yusuf ve Ali ve es-Seyyid ve sâirleri meclis-i şer‘de karcı tâifesinden Mustafa ve Ahmed ve Mehmed ve diğer Mustafa ve Saray-ı atîk-i sultânî karcısı Mustafa mahzarlarında, kadîmü’l-eyyâmdan dört aded gedikli karcının İstanbul’da dört mahalde başka başka mahzenleri olup ve Saray-ı atîk karcısı dahi saray-ı mezkûrdan fazlasını dilediği mahalde başka mahzene vaz‘ edip şerbetçi tâifesi dahi kendi dükkânına karîb ve münâsib olan mahzenden alagelmişiken hâlâ nizâm-ı kadîme muhâlif mezbûrûn karcı tâifesi cümlesi birbiriyle ittifâk ve ittihâz edip cümlesi bir yerde cem‘ ve bir mahzene karlarını vaz‘ ve bir mahzenden bey‘ etmeleriyle tecemmü‘ ve kesret-i eşhâsdan nâşî bâ‘is-i fesâd olur deyû da‘vâ eylediklerinde mezbûrûn karcı tâifesi dahi nizâm-ı kadîmleri vech-i meşrûh üzre olduğunu her biri ikrâr ve i‘tirâf etmeleriyle, ba‘de’l-yevm nizâm-ı kadîmleri üzre karcı tâifesi getirdikleri karı dört mahalde dört mahzene ve saray-ı mezkûr karcısı dahi bir başka mahzene vaz‘ edip beş mahalde bey‘ ü şirâ olunmak üzre mezbûrûn karcı tâifesine tenbîh olundu. Ba‘de’l-yevm hilâfına hareket edip bâ‘is-i ihtilâl olanları veliyyü’l-emr ile te’dîb ve ta‘zîri bâbında fermân men lehü’l-emrindir. Fî 14 Zilka‘de sene [1]138.