İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 172 Hüküm no: 95 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Berberler kethüdâsı İsmail Çelebi’nin çamaşırcıların işlerine karışmaması Câmeşûy i‘lâmı Ma‘rûz-ı dâ‘î-i devletleridir ki Mahmiye-i İstanbul’da câmeşûycular kethüdâsı Mustafa Beşe [b.] Mehmed ve ustalarından mektûbü’l-esâmî on beş nefer müslimîn meclis-i şer‘de mahmiye-i mezbûrede berberler kethüdâsı olan İsmail Çelebi mahzarında kadîmü’l-eyyâmdan ilâ hâze’l-ân câmeşûyculuk başka san‘at ve berberlik başka san‘at olup ve her birinin kethüdâsı dahi başka olmağla her biri kendi hırfetinde gayrı âharın hırfetinde olan gedik şâkird ve gedik halîfe ve gedik ustalarına kat‘â karışmayıp ancak taraf-ı saltanat-ı aliyyeden ihrâcı fermân buyurulan ordu-yı hümâyûn bedeliyyesinden birbirlere birer mikdâr akçe imdâd etmek üzre yamak kayd olunup nizâm-ı hâlimiz bu vech üzre muntazam iken mezbûr İsmail berberler kethüdâsı olup bizim şâkirdlerimiz başka çıkdıkda, benden izin almadıkça halîfelik ettirmem deyû şâkirdlerimize ve sâir umûrumuza bî-vech müdâhale ve mu‘âraza edip nizâmımıza halel verir suâl olunup bî-vech müdâhale ve mu‘ârazadan men‘ olunmak matlûbumuzdur dediklerinde mezbûr berberler kethüdâsı İsmail, fi’l-hakīka mezbûrların nizâm-ı kadîmleri vech-i meşrûh üzre olduğunu ba‘de’l-ikrâr, hakīkat-i hâl-i vukūfu olan bî-garaz müslimînden istifsâr olundukda onlar dahi fi’l-hakīka kaziyye vech-i meşrûh üzre olduğunu her biri mezbûr İsmail muvâcehesinde ihbâr etmekle ber mûceb-i nizâm-ı kadîm ba‘de’l-yevm fermân-ı âlî ile iktizâ eden evâmir-i aliyyeden mâ‘adâ câmeşûycular umûruna karışmamak üzre mezbûr berber kethüdâsı İsmail’e kıbel-i şer‘den tenbîh olundu. El-emru li men lehü’l-emr. Fî 23 Zilhicce sene [1]138.