İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 200 Hüküm no: 121 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tulumbacı şeridini işleyenlere Ali Gerçek’in kethüdâ tayin edildiği ve sayılarının yirmi bir usta ve otuz tezgâhı aşamayacağı Allahü hasbî Mâ fîhi kemâ fîh, harrerehu’l-fakīr ileyhi sübhânehû -azze şânühû- Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da hâlâ tulumbacıbaşı olan Davud Gerçek b. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edip hâlâ mahmiye-i mezbûrede tulumbacı şeridi demekle beyne’n-nâs meşhûr olan şeridi işleyen benim menzilimden mâ‘adâ gerek müslim ve gerek zimmî ve gerek Yahûd cümlesi yirmi bir nefer ve otuz destgâh olup bu mertebe usta ve destgâh vâfî ve kâfî olmağın, bundan ziyâde olursa muhtel ve müşevveş ve kalb ve redî olmak ihtimâli olmağla bundan ziyâde olmaya. Ba‘de’l-yevm işlenen şerid perdâhtlı yâhud tokmaklı olmaya, birkaç gün isti‘mâl olundukda kalb ve redî olduğu zâhir olmağın destgâhdan çıktığı gibi bey‘ ü şirâ oluna ve bu güne gelince işlenip perdâhtlı yâhud tokmaklı bulunursa kethüdâ ma‘rifetiyle damgalana, ba‘de’l-yevm bulunursa mîrî için girift oluna ve zikr olunan yirmi bir usta ve otuz destgâhın cümlesini zabt u rabt için cümlesini bir hana veya bir mahalle cem‘ oldukları hâlde işlene deyû nizâm verilip husûs-ı mezbûru âlim ve fenninde mâhir bir kimesne dahi üzerlerine kethüdâ nasb ve ta‘yîn olunmak lâzım ve mühim ve sulbî oğlum işbu hâzır bi’l-meclis Ali Gerçek husûs-ı mezbûru âlim ve her vech ile fenninde mâhir ve mahall ü müstahıkdır deyû inhâ ve husûs-ı mezbûr için fermân-ı âlî ibrâz etmeğin, imtisâlen-leh mezbûr Ali Gerçek hırfet-i mezbûre üzerlerine savb-ı şer‘den kethüdâ nasb ve ta‘yîn olundukda mezbûr Ali Gerçek dahi kethüdâlık-ı mezbûru kabûl ve hizmet-i lâzımesin edâya ta‘ahhüd eyledi. Nizâm-ı mezkûr hırfet-i mezbûre beynlerinde ba‘de’l-yevm düstûrü’l-amel kılınmak üzre mâ hüve’l-vâki‘ bi’t-taleb ketb olundu. Fi’l-yevmi’s-sâlis min Zilhicceti’ş-şerîfe sene [1]138. Şuhûdü’l-hâl: Mehmed Çelebi b. Mehmed, Sâlih Çelebi b. Süleyman, Abdullah Efendi b. Abdullah, Mehmed Çelebi b. Abdullah.