İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 208 Hüküm no: 127 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tekfur Sarayı, Hasköy, Galata’da Kulekapısı ve Cebealikapısı’ndaki şişecilerin kaliteli üretim yapmak üzere tekrar açılmaları Ma‘rûz-ı dâ‘î-i devletleridir ki İstanbul’da ve civârında vâki‘ şişeci tâifesinin nâzırları olan es-Seyyid Ömer Ağa meclis-i şer‘de esnâf-ı mezbûrenin ihtiyârları ve kârhâne sahibleri muvâcehelerinde mezbûrûn işledikleri şişeleri kadîmden olageldiğinden dirhem cihetinden noksan ve alçak işlemeleriyle san‘at-ı merkūmenin nizâmına halel verirler deyû teşekkî eyledikde onlar dahi yolluk ta‘bîr olunur şişeyi on iki dirhemden sekiz dirheme ve ağzı kırık ta‘bîr olunur şişeyi altı dirhemden dört dirheme ve pazarî ta‘bîr olunur depe camı altmış dirhemden kırk beş dirheme gelince işlenip noksan işlememek üzre ve beynlerinde ma‘lûm mâye ta‘bîr olunur şîkest şişeleri dahi esnâf-ı mezkûre erbâbı buldukları yerden kendileri almayıp ancak nâzır-ı merkūm alıp onlar dahi nâzır-ı merkūm yedinden her vakıyyede bir akçe bir fâide ile alıp ber minvâl-i muharrer nizâm-ı kadîmlerine muhâlif alçak ve redî işlememek üzre ta‘ahhüd eylediklerinde nâzır-ı merkūm bundan akdem Tekfur sarayı’nda ve Hasköy’de ve Galata’da Kulekapısı’nda ve Cebealikapısı’nda vâki‘ cem‘an dört aded kârhâneyi muhdesdir deyû kapayıp işlemekden men‘ etmekle hâlâ zikr olunan dört aded kârhâne ustaları mâdâm ki alçak ve redî işlemeyeler nâzır-ı merkūm ma‘rifetiyle ke’l-evvel açılıp aslah vech üzre işlemek şartıyla icmâ‘ ve ittifâk etmeleriyle fermân-ı âlî iltimâs eyledikleri huzûr-ı âlîlerine i‘lâm olundu. Bâkī fermân men lehü’l-emrindir. Fî 24 Zilhicce sene [1]138.