İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 213 Hüküm no: 135 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kassârlara Mustafa Beşe ile Hüseyin Beşe’nin kethüdâ tayin edildiği Ma‘rûz-ı dâ‘î-i devletleridir ki Derûn-ı arzuhâlde mezkûr kassâr tâifesinden Mustafa ve Kirkor ve Mıgırdiç ve Sahak ve Kirkor ve Nursiz ve Bağdasar ve Asfader ve sâirleri meclis-i şer‘de ashâb-ı arzuhâl Mustafa Beşe ve şerîki Hüseyin Beşe muvâcehesinde tâife-i mezbûrûn amele makūlesinden olup tüccârdan ve sâir kimesnelerden aldıkları metâ‘ı ücret-i ma‘lûme ile gereği gibi kassârlayıp gadr ve te‘addî ve tecâvüz etmeyip, beynlerinde ecnebî ve hâm-dest duhûl etmemek üzre birbirlerine kefîl ve bu vech üzre beynlerinde nizâm-ı kadîmleri olup lâkin kadîmden kethüdâları olmadığından nâşî beynlerinde ecnebî ve hâm-dest duhûl edip nizâmları muhtel ve müşevveş olmağın, mezbûrân Mustafa Beşe ve Hüseyin Beşe kadîmden usta ve san‘atımız erbâbından hizmet-i merkūmeyi kemâ yenbağī ikāme ve rü’yete kādirler ve muhtârımızdır deyû bi’l-muvâcehe haber verdiklerinde mezbûrân Mustafa Beşe ve Hüseyin Beşe dahi tâife-i mezbûra kethüdâ nasb ve ta‘yîn olunduklarında, onlar dahi kabûl ve ber vech-i muharrer hizmet-i lâzımesin edâya ta‘ahhüd eylediklerinden sonra tâife-i mezbûrûn birbirine kefîl ve mezbûrûna dahi kethüdâları kefîl olup bu vech üzre nizâmları düstûrü’l-amel olmak üzre kavl ü ittifâk ve ahd ü mîsâk etmeğin mûcebince yedlerine berât-ı âlîşân verilmek recâsıyla fermân-ı âlî iltimâs eyledikleri huzûr-ı âlîlerine i‘lâm olundu. Fî 29 Zilhicce sene [1]138.