İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 214 Hüküm no: 136 Orijinal metin no: [40b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arka hamalları kethüdâsının Saraçhane hamalları hakkındaki şikâyetinin yersiz olduğu Ma‘rûz-ı dâ‘î-i devletleridir ki Mahmiye-i İstanbul’da arka hammâllarının kethüdâları olan Mustafa b. el-Hâc Ahmed meclis-i şer‘de mahmiye-i mezbûrede Saraçhâne-i âmire kethüdâsı olan el-Hâc Mehmed mahzarında zikr olunan Saraçhâne-i âmire dâhilinde vâki‘ sekiz nefer arka hammâlları Saraçhâne-i âmire’de dükkânlarından? iktisâb ve intifâ‘ ederlerken kurbunda olan hammâllara bâ fermân-ı âlî nâzil olan kürekçi bedelinden imdâd ve i‘ânetten imtinâ‘ ederler deyû da‘vâ ettikde, Saraçhâne kethüdâsı mezbûr el-Hâc Mehmed cevâbında, mâ tekaddemden ilâ hâze’l-ân Saraçhâne-i âmire dâhilinde cem‘an sekiz aded pâzvend olup hâricde olan hammâllara karışmayıp ve hâricde olan ibâdullâhın yüklerini sâir hammâllar misillü götürügelmeyip ancak leylen pâzvendlik ve nehâren Saraçhâne-i âmirede inşâ olunan mîrî kırba ve meşk ve sandık ve sâir âlât-ı seferiyeyi cebehâne-i [41a] ma‘mûreye ve sâir iktizâ eden mahallere nakl edegelip nizâm-ı hâlleri bu vech üzre muntazam ve hâricde olan hammâlların iddi‘âları hilâf-ı nizâmdır deyicek fi’l-hakīka zikr olunan sekiz nefer âdem Saraçhâne-i âmirede leylen pâzvend ve nehâren mîrî âlât-ı seferiye nakline memûrlar olmalarıyla bu mukābelede cümleden mu‘âf olup bu âna gelince hâricde olan hammâllara bir nesne veregeldikleri yokdur deyû vukūfu olan Saraçhâne-i mezbûre ahâlîsi ihbâr etmeleriyle, mezbûr hammâllar kethüdâsı Mustafa hilâf-ı nizâm bî-vech mu‘ârazadan men‘ olunduğu huzûr-ı âlîlerine i‘lâm olundu. Fermân men lehü’l-emrindir. Fî 2 Muharrem sene [1]139.