.:: İstanbul Kadı Sicilleri ::.


İstanbul Mahkemesi 24 Numaralı Sicil (H. 1138-1151/M.1726-1738)
cilt: 21, sayfa: 215
Hüküm no: 137
Orijinal metin no: [41a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Seyyid Ahmed b. Mehmed’in icat ettiği tonbaz mavnaların yasaklandığı

Ma‘rûz-ı dâ‘î-i devletleridir ki Mahrûse-i Galata’da Azebkapısı’nda vâki‘ mavnacı tâifesinden kethüdâları Hacı İbrahim oğlu Sâlih Beşe ve Mustafa b. Şaban ve Mehmed b. Abdullah ve Ayazmakapısı kethüdâsı Mustafa b. Ahmed ve Ahmed b. Ali ve Abdullah b. İbrahim ve Abdullah b. Ali ve Osman b. Hüseyin ve Mehmed b. Ahmed ve Receb b. Süleyman ve Sâlih b. Murad ve diğer Receb b. Ahmed ve Mustafa b. Mehmed ve Yusuf b. İbrahim ve Memiş b. İbrahim ve Mustafa b. Mehmed nâm kimesneler, yine mahrûse-i mezbûrede Kalafatyeri nâm mahalde Rûznâmeci İbrahim Efendi vakfından bi’l-icâreteyn iki aded darağaçlarına mutasarrıfe olan Afife Hanım’ın zevci ve mârrü’z-zikr darağaçlarına müste’ciren mutasarrıf olan es-Seyyid Ahmed b. Mehmed mahzarında her biri biz mavnacı tâifesinden olup kadîmü’l-eyyâmdan beri Cebehâne ve Tophâne ve hareket-i hümâyûn hizmetlerine bezl-i makdûr ve sa‘y ü ihtimâm ede gelip ve mârrü’z-zikr darağaçlarına basılan sagīr ve kebîr sefîneler ashâbı sefîneleri içinde olan safralarını kadîmden beri ücret ile bizim mavnalarımıza tahmîl etmek ekser medâr-ı ma‘âşımız iken müste’cir-i mezbûr es-Seyyid Ahmed darağaçları mücerred vakıfdır deyû tama‘-ı hâmından nâşî tonbaz mavnaları îcâd edip bizim kadîmden beri medâr-ı ma‘âşımız olan kârımıza mâni‘ olmuşlardır deyû da‘vâ ve husûs-ı mezbûr sefîne sâhiblerinden reisler kethüdâsı ve sâir vukūf-ı tâmları olan bî-garaz müslimînden tefahhus ve suâl olundukda fi’l-hakīka kadîmü’l-eyyâmdan bu âna gelince mârrü’z-zikr darağaçlarına basılan sefîneler ashâbı içinde olan safraların mezbûrûn mavnacı tâifelerinin mavnalarına ücret ile tahmîl edegelmiştir müste’cir-i mezbûr es-Seyyid Ahmed’in peydâ eylediği tonbaz mavnaları muhdesdir deyû ihbâr eylediklerinden mâ‘adâ mezbûr ibrâz eylediği i‘lâmında mârrü’z-zikr darağaçlarına mülhak vakıf nâmıyla tonbaz ve mavna kaydı olmayıp ve muhdes idiğini dahi huzûr-ı şer‘de ikrâr etmekle, mûcebince es-Seyyid Ahmed’in îcâd eylediği tonbaz ve mavnaları men‘ ve kemâ fi’l-evvel mavnacı tâifelerinin medâr-ı ma‘âşlarına mâni‘ ve müzâhim olmamak üzre mezbûr es-Seyyid Ahmed’e tenbîh olunduğu huzûr-ı âlîlerine i‘lâm olundu. Fî 2 Muharrem sene [1]139.