İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 215 Hüküm no: 138 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Yorgi v. Hristo’nun Şehremini’ndeki fırından başka yerden ekmek almayacağı Ma‘rûz-ı dâ‘î-i devletleridir ki Derûn-ı arzuhâlde mastûr olan merhûme ve mağfûrun-lehâ Vâlide Sultân-ı Atîk hazretlerinin Şehremîni sûku kurbunda vâki‘ habbâz fırınının müste’ciri olan Mehmed b. Abdullah meclis-i şer‘de Samatyakapısı hâricinde bakkal olan Yorgi v. Hristo zimmî benim mutasarrıf ve müste’ciri olduğum fırın-ı mezbûrda tabh olunan nân-ı azîzi bey‘ edegelmiş iken âhar fırından dahi ekmek getirip benim ekmeğim ile halt ve bey‘ edip bayata kalan ekmek senin fırınından geldi deyû bana red ile gadr eder deyû teşekkî eyledikde zimmî-i mezbûr ta‘zîr için haps olunmuş idi ba‘de’l-yevm zimmî-i mezbûr fırın-ı merkūmdan gayrı kat‘â âhar fırından ekmek bey‘ etmeyip ancak benim mutasarrıf olduğum fırın-ı mezbûrdan bey‘ etmeğe râzı ve müte‘ahhid oldukda mezbûrun nefsine ve hîn-i mütâlebede huzûr-ı hükkâma ihzârına ekmekçiler kethüdâsı Mehmed Ağa b. Ali ve yiğitbaşı Ömer b. Mehmed ve Samatya’da bakkal Dimo v. Panayot ve Hristo v. Yorgi ve Anaştaş v. Yorgi ve Tanaş v. Dimo kefîl oldukları tescîl-i şer‘î olup ıtlâkını recâ ederler. El-emru li men lehü’l-emr. Fî 9 Muharrem sene [1]139.