İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 224 Hüküm no: 141 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayasofya Medresesi sakinlerinde herhangi bir harp aleti bulunmadığı Bâ sah Mûcebince amel olunmak deyû buyruldu. Ma‘rûz-ı dâ‘îleridir ki Sâdır olan fermân-ı âlîlerine imtisâlen ahad günü ba‘de’l-asr bu dâ‘îleri bi’n-nefs Ayasofya-i kebîr medresesinde Darendeli Mehmed Efendi dâ‘îlerinin sâkine olduğu hücreye varıp bi’l-cümle sükkânının odaları tefahhus olundukda medrese-i mezbûrede sâkine olup mukaddemâ hücresinde bir tüfenk bulunan kimesneye ta‘zîr olunduğu vakitde fîmâ ba‘d odalarında âlet-i harb bulunmamak üzerine kendilere tenbîh-i ekîd ile tenbîh olunduğuna binâen el-yevm mezbûrların odalarında kat‘â tüfenk ve kılıç ve sâir âlet-i harb bulunmayıp ancak Molla Mahmud nâm kimesnenin hücresinde paslı ve kınsız bir köhne kılıç bulunup, onu dahi kuzâtdan hâlâ Bursa’da sâkin Mehmed nâm kimesne bi tarîki’l-emâne bırakıp gitmişdir deyû ihbâr olundukdan sonra medrese-i mezbûrenin fevkānî ve tahtânî kırk yedi hücerâtı derûnunda cem‘an doksan nefer kimesne sâkin olmağla mezbûrlar ale’l-esâmî ba‘de’t-tahrîr, fîmâ ba‘d odalarında ol makūle âlet-i harb vaz‘ ve kimesnenin vedî‘asını kabûl etmeyip ve ders okumak bahânesiyle odalarına ba‘zı emred ve sâir erâzil ve eşhâs gelmeyip ve ders okudanlar dahi câmi‘de okudup ve bir hücrede ikişer âdemden ziyâde olmayıp ve arzıyla olmayıp ehl-i hevâ ve erâzil olanlar içlerinden ihrâc olunmak üzre medrese-i mezbûrenin mu‘îdi Mehmed Efendi ile Ayasofya Kayyımbaşısı Mustafa Efendi’ye ba‘de’t-tenbîh sükkân-ı medrese-i mezbûre dahi minvâl-i meşrûh üzre ta‘ahhüd ve birbirlerine tekeffül edip ve cümlesine dahi mu‘îd-i mezbûr ile kayyumbaşı-i mezbûr tekeffül eyledikleri tescîl-i şer‘î olunup huzûr-ı âlîlerine i‘lâm olundu. Bâkī fermân men lehü’l-emrindir. Fî 13 Muharrem sene [1]139.