İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 225 Hüküm no: 142 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Ağa’nın Tavukpazarı’ndaki kiraladığı arsaya çörekçi fırını yapmasına izin verildiği Ma‘rûz-ı dâ‘îleridir ki Sâhib-i arzuhâl Sâlih Ağa meclis-i şer‘de takrîr-i kelâm eyledikde mahmiye-i İstanbul’da Tavukpazarı’na kârgîr cedîd hâne karşısında merhûm Abdüsselam evkāfı’ndan bi’l-icâreteyn taht-ı tasarrufumda olan muhterik arsa-i hâliye [üzerinde] kat‘â nân-ı azîz tabh olunmayıp ancak yağlı çörek ve börek ve bunun emsâli çörek metâ‘ı tabh ve narh-ı cârî üzre ibâdullâha bey‘ olunmak için kendi hâlimde müceddeden kârgîr çörekçi fırını binâ etmek murâdımdır, husûs-ı mezbûr çörekçiler kethüdâsı ve yiğitbaşısı ve ihtiyârlarından suâl olunup haberleri tahrîr ve savb-ı şer‘den izin verilmek murâdımdır dedikde, husûs-ı mezbûr Çörekçiler kethüdâsı Mehmed Beşe b. Ahmed, yiğitbaşı es-Seyyid Hüseyin b. es-Seyyid Ahmed ve ustalarından el-Hâc Selim b. Mehmed ve es-Seyyid Mustafa b. Osman ve usta Ali b. Mehmed ve diğer usta Ali b. Mehmed ve İbrahim b. Ali ve el-Hâc İbrahim b. Halîfe’den istifsâr olundukda fi’l-hakīka mahall-i mezbûrda nân-ı azîz tabh olunmayıp yağlı çörek ve börek ve bunun emsâli çörek metâ‘ı tabh ve narh-ı cârî üzre ibâdullâha bey‘ olunmak için müceddeden kârgîr çörekçi fırını binâ olunsa aslâ kimesneye zararı yokdur, ol havâlîde olan ibâdullâha enfa‘dır deyû ihbâr etmeleriyle, arsa-i mezbûre üzerine kârgîr çörekçi fırını binâsına mezbûr Sâlih Ağa’ya izin verildiği huzûr-ı âlîlerine i‘lâm olundu. El-emru li men lehü’l-emr. Fî 22 Muharrem sene [1]139.