İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 226 Hüküm no: 143 Orijinal metin no: [44a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aşçı Nano ile Aşçı Simo’nun dükkânlarında Mercan fırınının ekmeklerinin satılacağı Ma‘rûz-ı dâ‘îleridir ki Sâhib-i arzuhâl Haçuk zimmînin taht-ı icâresinde olan Mercan fırınının karşısında vâki‘ Aşçı Nano zimmî ve Tavukpazarı’nda Sırıkçılar köşesinde aşçı Simo zimmînin dükkânlarında bey‘ olunan nân-ı azîz kadîmden zikr olunan Mercan fırınından bey‘ oluna gelip âhar fırınların alâka ve medhalleri olmayıp ve nizâm-ı kadîmleri dahi her birinden âharın ta‘yînâtına müdâhale edegelmediğinden mâ‘adâ zikr olunan aşçılar âhar fırından ekmek bey‘ etmeyip kadîmî üzre nizâm verile deyû müste’cir-i mezbûrun yedine musahhah fermân-ı âlî ihsân olunmuşiken, müste’cir-i mezbûr Haçuk zikr olunan aşçılar âhar fırınlardan ekmek getirip dükkânlarında hilâf-ı fermân ve mugāyir-i nizâm bey‘ etmeleriyle bana gadr ve nizâm-ı kadîmimize [44b] halel verirler deyû teşekkî eyledikde nizâm-ı kadîmleri üzre fırın-ı mezbûrdan bey‘ etmek üzre mezbûrân aşçılara kıbel-i şer‘den tenbîh ve huzûr-ı âlîlerine i‘lâm olundu. Fermân men lehü’l-emrindir. Fî 29 Muharrem sene [1]139.