İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 257 Hüküm no: 166 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çamaşır yıkayıcı esnafı kethüdâlığının yeniden Mustafa’ya verildiği İşbu râfi‘u tevkī‘-i refî‘ü’ş-şân-ı hâkānî kıdvetü’l-emâsil ve’l-akrân Mustafa -zîde kadruhû- Dîvân-ı hümâyûnuma arzuhâl edip İstanbul’da vâki‘ câmeşûycu esnâfının kethüdâları olup yiğitbaşı ve sâir usta ve ihtiyârlar ma‘rifetleriyle ba‘de’l-yevm fukarâ ve zu‘afâya enfa‘ olmak üzre esvâbları pâk yıkayıp ve beynlerinde kefere ve hâm-dest ve üstâda hizmet etmeyip, ma‘rifet-i kethüdâ bulunmadıkça dükkân ihdâs eylememek üzre kadîmî olan ustalar birbirlerine kefîl ve mezbûrûna dahi kendisi kefîl olup ale’l-esâmî defter ve düstûrü’l-amel olunmak üzre akzâ kuzâtü’l-müslimîn İstanbul kadısı Kethüdâzâde Mehmed -zîdet fezâiluhû- i‘lâm etmekle, mûcebiyle tevcîh ve berât olunmak lâzım iken sehven fermân-ı âlîşânım sâdır olmağın, lâkin kethüdâların ekseri berât-ı âlîşân ile kethüdâ olmalarıyla yedine verilen emr-i âlîşân mûcebince kethüdâlık-ı mezbûr müceddeden kendiye tevcîh ve yedine berât-ı şerîf-i âlîşân verilmek bâbında inâyet recâ etmeğin, vech-i meşrûh üzre bin yüz otuz sekiz senesi Zilhiccesi’nin üçüncü günü emr-i şerîf verildiği başmuhâsebeden derkenâr olunmağın, mûcebince tevcîh olunmak bâbında fermân-ı âlîşânım sâdır olmağın hakkında mezîd inâyet-i pâdişâhânem zuhûra getirip bin yüz otuz sekiz senesi Zilhiccesi’nin yirminci günü târihiyle müverrah verilen ruûs-ı hümâyûnum mûcebince bu berât-ı hümâyûn-ı izzet-makrûnu verdim ve buyurdum ki mûmâ-ileyh Mustafa -zîde kadruhû- varıp esnâf-ı mezbûrun kethüdâsı olup hizmet-i lâzımesin mer‘î ve müeddâ kıldıkdan sonra işbu berât-ı âlîşânıma mugāyir efrâd-ı âferîdeden hiç mâni‘ ve müzâhim olmayıp dahl ü ta‘arruz kılmayalar şöyle bileler alâmet-i şerîfe i‘timâd kılalar. Tahrîren fi’l-yevmi’s-sânî [min] şehri Safer li sene tis‘a ve selâsîn ve mi’e ve elf. Be makām-ı Kostantıniyye el-mahrûse