İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 265 Hüküm no: 175 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beykoz, İncirli, Anadolu Hisarı ve Kanlıca’daki piyade kayıkçıları nizamı ve kethüdâ tayini Allahü hasbî Mâ fîhi kemâ fîh, harrerehu’l-fakīr ileyhi sübhânehû azze şânühû Kethüdâzâde Mehmed el-kadı bi Dâri’s-saltanati’l-aliyye -ufiye anhu- Beykoz ve İncirli ve Anadolu Hisarı ve Kanlıcak’da vâki‘ piyâde kayıkçılarının kethüdâları olmamakla beynlerinde nizâmları olmayıp hisâr-ı mezkûr ağasının arzı mûcebince bu fakīre hitâben sâdır olan fermân-ı vâcibü’l-imtisâle binâen kurâ-i erba‘a-i mezkûre iskelelerinde vâki‘ piyâde kayıkçılarının üzerlerine hisâr-ı mezkûr sükkânından Mehmed Beşe b. ( ) nâm kimesne kethüdâ nasb ve ta‘yîn ve her bir iskeleye birer bölükbaşı nasb olunmak üzre ve cümlesinin üzerlerine hisar ağası nâzır olmak üzre nizâm verilip [55a] ve ibâdullâhı mürûr ve ubûrda ziyâde akçe talebiyle ızrâr etmeyip kadîmden olageldiği üzre mevâzi‘-i mezkûreden piyâde kayıklar ile İstanbul’a mürûr edenlerden zihâb ve iyâba âdem başına birer paradan ziyâde taleb olunmamak üzre tenbîh ve te’kîd olundukdan sonra merkūm Mehmed Beşe dahi mezkûr kethüdâlığı ba‘de’l-kabûl kurâ-i erba‘a-i mezkûre iskelelerinde ber minvâl-i muharrer birer bölükbaşı nasb edip ve birbirlerini kefîle verip ve kefîli olmayanları kayıkçılıkdan ihrâc ve cümlesine kendi kefîl olup ve ba‘de’l-yevm ibâdullâhı ızrâr ettirmemek üzre ta‘ahhüd ve iltizâm etmeğin bu makūle umûr-ı âmmenin nef‘an li’l-ibâd tenfîz ve ibkāsiyçün hükm-i hümâyûn elzem ve levâzımdan olmağla hükm-i hümâyûn iltimâs eylediklerinde mâ hüve’l-vâki‘ bi’t-taleb ketb olundu. Fî 17 Saferi’l-hayr sene [1]139. Şuhûdü’l-hâl: Eyyûb Efendi b. Abdullah, es-Seyyid Mustafa Çelebi b. Abdullah, Mehmed Ağa b. Mehmed, Molla İbrahim b. Osman.