İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 266 Hüküm no: 176 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Turşucuların her türlü turşu çeşidi ile sirke, bakkalların ise sadece sirke ve lahana turşusu satabilecekleri Ma‘rûz-ı dâ‘î-i devletleridir ki Sâdır olan fermân-ı âlîleri üzre tarafeynin yedlerinde olan senedâta nazar olundukda yedlerinde olan hücec ve evâmir-i aliyyeler mûciblerince kadîmü’l-eyyâmdan ilâ hâze’l-ân turşucu tâifesi envâ‘-ı turşu ve sirke ve lahana turşusu bey‘ ü şirâ edip bakkal tâifesi ancak sirke ve lahana turşusu bey‘ ede gelip hattâ husûs-ı mezbûru nâtık bin yüz yirmi yedi senesi Saferü’l-hayrı’nda bir kıt‘a [ve] yirmi sekiz Muharremi’nde bir kıt‘a ve yüz [otuz] altı Muharremi’nde bir kıt‘a bakkal tâifesinin bey‘ ü şirâ ede geldikleri sirke ve lahana turşusu tâifesi bî-vech müdâhale etmemek üzre evâmir-i şerîfeler verildiği derkenâr ve i‘lâm olunmakla derkenâr mûcebince amel olunup turşucu tâifesi bakkal tâifesinin kadîmden beri bey‘lerine müdâhale etmemek üzre mukaddemâ ve hâlâ verilen evâmir-i şerîfeye mugāyir müdâhaleleri men‘ ü def‘ olunmak bâbında bin yüz otuz altı senesi Saferü’l-hayrı’nın onikinci günü tekrâr emr-i şerîf-i vâcibü’l-imtisâl ihsân olunmağın, mûcebince turşucu tâifesi lahana ve sirke ve envâ‘-ı turşu bey‘ ve bakkal tâifesi ancak sirke ve lahana turşusu bey‘ edip ahadühümâ âharın bey‘ine müdâhale ve mümâna‘at etmemek üzre tarafeyne tenbîh olundu. Husûs-ı mezbûru nâtık tuğrâ-yı garrâ-yı sultânî ile muhallâ emr-i şerîf-i âlîşân recâ ve niyâz eyledikleri huzûr-ı âlîlerine i‘lâm olundu. El-emru li men lehü’l-emr. Fî 22 Safer sene [1]139.