İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 280 Hüküm no: 192 Orijinal metin no: [59a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yedikule dışındaki debbağların ahîbabalığına el-Hâc Abdullah b. Mustafa’nın tayini Ma‘rûz-ı dâ‘î-i devletleridir ki Mahmiye-i İstanbul hısnı ebvâbından Yedikule hâricinde vâki‘ debbâğ tâifesinin ahîbabaları olan imâm el-Hâc Musa b. el-Hâc Mehmed kendi hâlinde olmayıp kadîmden ilâ hâze’l-ân fusûl-i erba‘ada verilen narh-ı cârîden adem-i itâ‘ati ve tebdîl ve tağyîri ve celebkeşân tâifesinin zararları ve sâir tezvîrât ve fesâdlariyçün dârü’n-nedve ittihâz eylediği menzilinde dâimâ akd-i meclis-i şer‘ ve habâset edip envâ‘-ı tezvîrât ve fesâd ve habâset etmekle icmâ‘ ve ittifâk ve dâimâ ibâdullâhı ızrâr kasdındadır deyû mevsûkun-bih ustaları teşekkî ve tâife-i mezbûrenin ihtiyârlarından olup cümlenin mu‘temedi ve muhtârı olan Yeni usta oğlu demekle ma‘rûf el-Hâc Abdullah b. Mustafa zikr olunan ahîbabalığın uhdesinden gelmeğe kādir ve her vechile mahall ü müstahık olduğunu ihbâr etmeleriyle, mezbûr imâm el-Hâc Musa zikr olunan ahîbabalıkdan azl ve ref‘ olunmağın, mezbûr el-Hâc Musa fîmâ ba‘d tâife-i mezbûrenin umûruna karışmamak üzre talâk-ı selâseye şart ve ta‘lîk ve ber vech-i muharrer hüccet-i şer‘iyye ketb ve tâife-i mezbûre yedlerine verildikden sonra tâife-i mezbûreye mezbûr el-Hâc Abdullah ber vech-i muharrer ahîbaba nasb ve ta‘yîn olunup mûcebince mezbûr el-Hâc Musa’nın ref‘inden mezbûr el-Hâc Abdullah yedine berât-ı şerîf-i âlîşân sadaka ve ihsân buyurulmak recâsında oldukları huzûr-ı âlîlerine i‘lâm olundu. Bâkī fermân men lehü’l-emrindir. Fî 24 min Saferi’l-hayr sene [1]139.