İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 281 Hüküm no: 194 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nalcı esnafının işlerine kethüdâları dışında karışılmaması Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki İstanbul’da vâki‘ na‘lçacı esnâfından ve ( ) ve ( ) ve ( ) nâm kimesneler Dîvan-ı hümâyûnuma arzuhâl edip esnâf-ı mezbûra müte‘allik düşen umûrları kethüdâları ma‘rifetiyle görülüp esnâf-ı mezbûreden âharı müdâhale eylemek lâzım gelmez iken, içlerinden ba‘zıları hilâf-ı şer‘-i şerîf Kasım ve Hızır İlyas akçesi nâmıyla akçe taleb ve dükkân bey‘ ve iştirâ edenlerden dahi cebren akçe alıp ve bunun emsâli fukarâya gadr ve te‘addî eylediklerin bildirip, ahvâlleri kethüdâları ma‘rifetiyle görülüp hilâf-ı şer‘-i şerîf rencîde ve te‘addî ettirilmemek bâbında emr-i şerîfim recâ eyledikleri ecilden, imdi kethüdâları ma‘rifetiyle hilâf-ı şer‘-i şerîf te‘addî olunmayalar deyû fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzre amel edip dahi husûs-ı mezbûru ma‘rifet-i şer‘le ve kethüdâları ma‘rifetiyle göresin, esnâf-ı mezbûreden ba‘zılarının hilâf-ı şer‘-i şerîf ol vechile rencîde ve te‘addî eyledikleri vâki‘ ise men‘ ü def‘ edip hilâf-ı şer‘-i şerîf ol vechile rencîde ve te‘addî ettirmeyesin. Şöyle bilesin, alâmet-i şerîfe i‘timâd kılasın. Tahrîren fi’l-yevmi’t-tâsi‘ şehri Rebî‘ilâhir sene semân ve selâsîn ve mi’e ve elf. Be makām-ı Kostantıniyye el-mahrûse.