İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 283 Hüküm no: 197 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nizamlara aykırı hareket eden bal mumcu Mikel ve Rafayel’in cezalandırılması talebi Ma‘rûz-ı dâ‘î-i devletleridir ki Balmumcu esnâfının kethüdâları Abdülbâkī ve ihtiyârlarından cemm-i gafîr meclis-i şer‘de Galata’da balmumcu ve mahzenci Mikel? ve Rafayel nâm yahudiler mahzarlarında, kadîmü’l-eyyâmdan ilâ hâze’l-ân taşradan gelip Galata gümrüğüne gelen şem‘-i asel narh-ı cârî üzre kifâyet mikdârı cânib-i mîrî için Matbah emîni tarafından ahz olundukdan sonra mâ‘adâsı kethüdâ ve ihtiyârlar ma‘rifetleriyle esnâfımıza tevzî‘ ve taksîm olunup hafiyyeten ahz ve der mahzen ve ihtikâr şer‘an ve kānûnen memnû‘ olmağla mezbûrâna taraf-ı şer‘den bi’d-defe‘ât tenbîh olunmuşiken yine mütenebbihler olmayıp biz alıp elçilere biz veririz deyû hafiyyeten narh-ı cârîden ziyâde bahâ ile gümrükden alıp der mahzen ve ihtikâr etmeleriyle fermân-ı âlî ve şer‘-i şerîfe adem-i itâ‘atlerinden mâ‘adâ nizâmımıza dahi halel verirler deyû teşekkî eylediklerinden, hâl ber vech-i muharrer üzre olduğu lede’ş-şer‘i’l-mutahhar zâhir ve mukarrer olmağla mezbûrların ta‘zîr ve te’dîbleri hazret-i veliyyü’l-emre tefvîz olundu. El-emr li men lehü’l-emr. Fî 6 Rebî‘ilevvel sene [1]139.