İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 283 Hüküm no: 198 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahçıvan taifesinin bamyacıbaşı vasıtasıyla sattıkları bamyaların satışına engel olunmaması Ma‘rûz-ı dâ‘î-i devletleridir ki İstanbul ve tevâbi‘-i Üsküdar ve Yoros ve Kasımpaşa’da ve sâir mahallerde vâki‘ bahçıvan tâifesinden bamya hâsıl eden ashâb-ı arzuhâl İbrahim Beşe [ve] Abdullah ve el-Hâc Ebûbekir ve Kasımpaşalı Ali ve Hüseyin ve Mehmed Beşe ve diğer Mehmed Beşe ve Halil Beşe ve Dimo ve Üstüyan ve Petko ve diğer Üstüyan ve Yorgi ve Şâhin ve Nikola nâm kimesneler meclis-i şer‘de biz bahçıvan tâifesinden olup otuz seneden mütecâvizdir ki bostanlarımızda hâsıl eylediğimiz bamyamızı gümrük kurbunda Eminönü nâm mahalle getirip, bâ berât-ı âlîşân bamyacıbaşı Kara Hüseyin nâm kimesneye teslîm, ol dahi de’b-i kadîm üzre Matbah-ı âmire için güzîdesinden kifâyet mikdârı ahz ve mâ‘adâ fazlasını yine kendi ma‘rifetiyle narh-ı cârî üzre esnâfa tevzî‘ ve taksîm, onlar dahi narh-ı cârî üzre ibâdullâha bey‘ etmek âdet-i kadîm olup bu vech üzre nizâm-ı hâlimiz var iken hâlâ yeniçeri ve cebeci tâifelerinden ba‘zı muhtekir kimesneler peydâ ve mahall-i mezbûre getirdiğimiz bamyalarımızı bamyacıbaşı-i mezbûrun izin ve haberi yoğiken cebren yedimizden ahz ve kimi noksan bahâ teklîf ve kimi dahi ahz ve gaybet ve bize gadr-ı küllî etmeleriyle, fîmâ ba‘d bahçelerimizde hâsıl eylediğimiz bamyalarımızı mârrü’z-zikr Eminönü nâm mahalle getirip, de’b-i kadîm üzre bamyacıbaşı-yı merkūm Hüseyin Bey’e teslîm, ol dahi Matbah-ı âmire için güzîdesinden iktizâ ettiği mertebesini ahz ve mâ‘adâsını dahi yine kendi ma‘rifetiyle narh-ı cârî üzre yed-i vâhidden esnâfa tevzî‘ olunup mârrü’z-zikr yeniçeri ve cebeci ve sâir muhtekir tâifelerini bamyacıbaşı-i mezbûrun izin ve ma‘rifetsiz kat‘â bamyalarımıza müdâhale ettirilmemek bâbında müekked fermân-ı âlî iltimâs ettikleri ma‘lûm-ı devletleri oldukda, husûs-ı mezbûr mazbût olmak için merâmlarına müsâ‘ade olunmak emr-i savâb idiği huzûr-ı âlîlerine i‘lâm olundu. Fermân hazret-i veliyyü’l-emrindir. Fî 9 Rebî‘ilevvel sene [1]139.